پوگس(تاجکستان) (پاکستان نیوزپوائنٹ 6جولائی2017ء) پاکستان ، اوگانستان، تاجکستانء ُ کرغستان ءِ رہنما آنی چارملکی سروکی اجلاس پنچ شمبے ءِ روچءَ بوتگ کہ ایشی ءِ تہا 1.2ارب ڈالر ھرچ ءِ کاسا1000بجلی ءِ منصوبہ ءِ سرءَ پیش رفت ءِ تپاسی کنگ بوتگ ء ُ رہنماآں اے منصوبہ ءِ زوت سرجمی ءِ ھاترءَ دراھیں گامگیجانی چست کنگءِ جزم کتگ۔ مزن وزیر محمد نوا زشریف ءَ ابید تاجک صدر امام علی رحمانوف، اوگان صدر اشرف غنی ء ُ کرغستان ءِ مزن وزیر سوران بے جین بیکوفءَ کاسا1000چہار فریقی اجلاسءَ ھواری کتگ۔
اے رہنما آنی اجلاس بنجاھی حکومت دوشنبے ءَ چہ 36کلومیٹر دور کوھستانی ھندء ُ دمگ پوگس ءَ بوتگ کہ ایشیءِ تہا اے ھاسیں منصوبہ ءِ سرءَ گپ ء ُ تران کنگ بوتگ کہ ایشی ءَ چہ آپی آسراتی وسیلگ ءَ ساپ ء ُ صلّیں ء ُ چاگرد دوست بجلی پیداک بیت۔ رہنما آں مئی 2016ءَ اے منصوبہ ءِ بندات کتگ بوتگ وھدے کہ مزن وزیر محمد نواز شریف ءِ حکومت ءَ منصوبہ ءَ را تینز کنگءِ ھاترءَ گامگیج چست کتگ ء ُ استنبول ءَ راج دپتری من ء ُ گر کنگ بوتگ۔
چارملکی اجلاسءَ تران ءِ تہا مزن وزیر محمد نوازشریف ءَ کاسا1000پاورپراجیکٹ ءَ خطہ ءِ ھاترءَ ھاسیں منصوبہ لیک اِتگ ایشی ءِ سرءَ زوت عملدرآمد ءِ حکومتی عزم ءِ درشانی کتگء ُ گشتگ کہ منصوبہ ءَ چہ خطہ ءِ تہا بیپاریءِ گیشی، سماجی ء ُ اقتصادی دیمروئی، توانائی ءِ کمیءَ را دور کنگ ، روزگار ءِ موھ پیداک کنگء ُ دمگی ھم آہنگی ءِ گیشیءِ تہا کمک رسیت۔
مزن وزیر ءَ کاسا1000اجلاسءِ مہمان جہلی ء ُجوانیں مہمان داری ءِ سرءَ تاجکستان ءِ صدرءِ شگر ادا کتگء ُ گشتگ کہ اے مئے خطہ ءِ تہا یک فلیگ شپ منصوبہ اِنت کہ درنیامی ایشیاء ءِ تہا تاجکستان ، کرغستان ء ُ جنوبی ایشیاءِ تہا اوگانستان ء ُ پاکستان ءَ را بجلی ءِ گرڈ ءِ وسیلگءَ چہ یکے دومی ءِ گوما بندوک کنت۔ ایشی ءِ سرجمی ءَ چہ پاکستانء ُ اوگانستان ءَ را تاجکستان ء ُ کرغستان ءَ چہ گرماگ ءِ موسم ءَ یک ہزار میگاواٹ ء ُ 300میگاواٹ بجلی حاصل بیت۔
آئیء َ گشتگ کہ اے منصوبہ باسکیں ملک آنی ھاترءَ اقتصادی ، سماجی ء ُ ماحولیاتی پاھدگ کاریتء ُ توانائی ءِ کمیءَ را دور کنگءَ ھوار روزگار ءِ موھ پیداک بیت، بیپاری ءِ تہا گہتری کیئت ء ُ ساپیں توانائی ءِ پھجاری ءَ چہ کاربن ڈائی آکسائیڈ خارج کنگءِ تہا کمی بیت۔ ایشی ءَ چہ دمگی ھم آہنگی ءَ ھم کمک رسیت۔ مارا اے گپء ِ سرءَ اوست کنگ لوٹ ایت اے منصوبہ وھدءِ سرءَ سرجم بہ بیت۔
مزن وزیرءَ گشتگ کہ اے منصوبہ مجوزہ سنٹرل ایشیا ء ساؤتھ ایشیا ء ریجنل الیکٹریسٹی مارکیٹ ءَ را سرجم کنگءِ ھاترءَ یک ھاسیں گامگیج اِت۔زانگ بہ بیت کہ کاسا 1000منصوبہ تاجکستان ء ُ کرغستان ءَ چہ پاکستان ء ُ اوگانستان ءَ را بجلی ءِ ترسیل ءِ منصوبہ اِنت۔ توانائی ءِ پڑءَ وتی ارزشت ءِ انفرادی منصوبہ کاسا1000ءِ بندات گوستگیں سال ءَ بوتگ۔ کاسایک ہزار منصوبہ دوہزار ھژدہ ءَ سرجم بیت۔
منصوبہ پاکستانءَ را ارزانیں ء ُ موحول دوستیں بجلی پھجارینگ ءِ سوب جوڈ بیت۔ کاسا1000ءَ چہ توانائی ءِ کمیءَ را گرء ُدار ءَ کمک رسیت۔ منصوبہ ءَ چہ دمگی نزیکی ءِ گیشی ء ُ بیپاری سُرء ُ پُر گیش بنت۔ منصوبہ ءَ چہ روزگارءِ موھ پیداک بنت ء ُ خطہءِ تہا وشھالی کئت۔ میاں اوستمانی بینک ءَ مارچ2014ءَ منصوبہ ءِ ھاترءَ 52کروڑ 65لکھ ڈالر ءِ گرانٹ ء ُ کریڈٹ فنانسنگ ءِ منظوری داتگ۔
منصوبہ توانائی ء ُ بیپاری راہداری آں چہ دمگی ملک آنی تہا کمک ءَ را گیش کنگءِ مزن وزیر ءِ وژنءِ عکس کشی اِنت۔ مزن وزیر محمد نواز شریف تاجکستان ءِ دو روچی ترء ُ تابءِ سرءَ اِنت۔ مزن وزیر ءِ دری کارانی ھاسیں صلہ کار سرتاج عزیز، آپء ُ لین ءِ بنجاھی وزیر خواجہ محمد آصف ء ُ بیپاریءِ وزیر ھم آئیء ِ ھمراھ اَنت۔
