اسلام آباد(پاکستان نیوز پوائنٹ 09جنوری2016ء) وزیراعظم نا سلاہکار قومی تاریخ و ادبی میرات عرفان صدیقی پارینے کہ علم و ادب نا مون آ دننگ قوم تا عزم و ارادہ ءِ زندہ تخنگ کن المی ءِ۔ داہیت ءِ او آزاد جموں و کشمیر نا صدر سردار مسعود خان تون ہیت وگپ کرسا پارے ہرادوشنبے آ سلاہکار وزیراعظم نا دفتراٹی اوڑتون اوڑدہی کرے۔ عرفان صدیقی اہل قلم کانفرنس اٹی صدر آزاد کشمیر نا ساڑی مننگ آ اونا منت واری ءِ ادا کرسا پارے کہ قومی تاریخ و ادبی میرات ڈویژن و اونا رداٹ کاریم کروک آ غٹ ادارہ غاک کشمیر کاز کن ہروڑاٹ ساڑی ءُ۔
پاکستان نا تاریخ ، ادب و جغرافیہ کشمیر تون گنڈوک ءِ۔ اوپارے کہ بھلا آن بھلا ظلم محکوم انسان تا جوزہ آجوئی ءِ شکست تننگ کپک۔ ادیب، شاعر ، دانشور و قلوم کار اہل کشمیر و اوفتا حق آجوئی نا دوئی نا جہد اٹی ہر اول دستہ جوڑ مننگ کیک۔ عرفان صدیقی پارے کہ بھاز زوت ”ضرب قلم و کشمیر “ کانفرنس آزاد کشمیر اٹی اڈ ہلیک۔ صدر آزاد کشمیر دا کانفرنس نامیزبانی نا پیش کش کرے۔ داوخت آ ہیت وگپ کرسا آزاد جموں و کشمیر نا صدر سردار مسعود خان ادیب، شاعر و اہل قلم نا چار دے ئی جہانی کانفرنس نا سرسہب اڈتننگ آ عرفان صدیقی ءِ مبارکبادی تس وپارے کہ ”ضرب قلم “ نا بناء علمی محاذ آ اہم ءُ گام اسے۔
