اسلام آباد(پاکستان نیوز پوائنٹ 09جنوری2016ء) صدر مملکت ممنون حسین پارینے کہ چین پاکستان اقتصادی راہداری آن پبی فائدہ ہرفنگ کن پوسکن آ نسل انا کڑد اہم ءِ و پاکستان اٹی ودی مروک آ پوسکن آ گمان آتیان مستفید مننگ کن طالب علم آتے پبی وڑاٹ تیار کیر۔ او داہیت ءِ دوشنبے آ ایوان صدر اٹی سندھ مدرستہ الاسلام یونیورسٹی کراچی نا طالب علم آتا ڈل اتون اوڑدہی نا وخت آ پارے ہراٹی وزیر مملکت تعلیم و پروفیشنل ٹریننگ انجینئر بلیغ الرحمان و وائس چانسلر ڈاکٹر محمد علی شیخ آن بیدس بڑزکو کمامدارآک ہم ساڑی ئسر۔
صدر مملکت پارے کہ سندھ مدرستہ الاسلام یونیورسٹی ءِ قائد اعظم تون نسبت نا سوب ایلو ادارہ غاتیان ممتاز ہند اس دوئی ءِ۔ اوپارے کہ یونیورسٹی معیاری تعلیم نا مون آ دننگ کن تینا کڑد ءِ ادا کننگ ءِ۔ گرج داہیت انا ءِ کہ طالب علم آک تینے پوسکن آ تعلیم آن آراستہ کرسا معاشی شونداری ٹی فعال کڑدادا کیر۔ صدر مملکت ادارہ نا کنڈآن بناء کروک آ نیشنل لیڈر شپ پروگرام آ خوشی نا درشانی ءِ کرسا پارے کہ آخبت اٹی دا پروگرام آن ورناتپہ ءِ بھاز فائدہ دوئی مریک و ورناتے تینا لائخی تے تالان کننگ نا موقع ملک۔
صدر مملکت طالب علم آتے مخاطب کرسا پارے کہ او بڑزکو تعلیم ضرورحاصل کیر و اونا دوئی کن اگہ پیشن نا ملک ہم ہنوئی تمے تو ضرور کار ولے تینا تہذیب ءِ گیرام کپس انتئے کہ ہموقومک آباد مریرہ ہرا تینا تہذیب ءِ قائم تخرہ۔
