اسلام آباد(پاکستان نیوز پوائنٹ 04جنوری2016ء) وزیراعظم محمد نواز شریف پارینے کہ جہانی زرکارآک پاکستان اٹی زرکاری ٹی بھاز است خواہی ظاہر کننگ ءُ، ہراڑآن ننا سرسہب اقتصادی پالیسی و زرکاردوست چاگڑد نا عکاسی مریک۔ اوداہیت ءِ چارشنبے آ داڑے بڑزکو کہول نا دیوان نا کماشی ءِ کرسا پارے ہراٹی اودے پاک چین اقتصادی راہداری نا شش می اسیجائی کمکارکمیٹی ٹی مروک آ پیش رفت نا بارواٹی معلومدار کننگا ہرا 29 دسمبر آ بیجنگ اٹی اڈ ہلکوسس۔
وزیراعظم ءِ پاننگاکہ 300 میگاواٹ بجلی نا ڈٹ انا معاہدہ غا دستخط مسنے و دا ڈٹ زوت بناء کیک، گوادر واٹر سپلائی ڈٹ، ہسپتال، ٹیکنیکل انسٹی ٹیوٹس و صوبائی ہیڈ کوارٹرزاٹی ماس ٹرانزٹ ریلوے ڈٹ آ ہم جے سی سی ٹی ہیت وگپ مس۔ اودے مستی پاننگاکہ چین سی پیک اٹی انڈس کیسکیڈ ڈٹ جاٹ آتا جاچ ءِ ہلنگ آہم امنا کرینے۔ وزیراعظم وزارت دیر و بجلی ءِ سی پیک نا رداٹ 1.5ارب ڈالر مالیت نا مٹیاری لاہور ٹرانسمیشن لین ڈٹ انا معاہدہ غامبارکبادی تس و داڑآ عملدرآمد کن سرگرمی اٹ پیروی نا پارت کرے۔
وزیراعظم ماس ٹرانزٹ ڈٹ جاٹ آتے ہر چارآصوبہ غاتیٹی اوار کننگ آ پاکستانی ٹیم ءِ ہم مبارکبادی تس و وزیر ریلوے ءِ پارت کرے کہ او ڈٹ جاٹ آتا فزیبلٹی کن تینا وزارت نا ٹیکنیکل ایڈوائس فراوان کرسا صوبہ غاتے آسراتی ایتے۔ وزیراعظم پارے کہ جہانی زرکارآک پاکستان اٹی زرکاری ٹی بھاز است خواہی ظاہر کننگ ءُ ہراڑآن ننا سرسہب اقتصادی پالیسی و زرکاردوست چاگڑد نا عکاسی مریک۔
اوپارے کہ شاہراتی رابطہ نا ڈٹ جاٹ آتیان پاکستان نا پدسلوک آ علاقہ غاتیٹی زرکاری بریک۔ وزیراعظم سی پیک ڈٹ جاٹ آ پیش رفت آ جم وڑاٹ است جمی نا درشانی ءِ کرے۔ صنعتی پارک آتا اڈتننگ نا بارواٹی وزیراعظم بنجائی کمامدارآتے پارت کرے کہ مجوزہ ہند آتے بجلی، گیس و ٹیلی مواصلات نا فراوانی نا عمل نا بناءِ کیر۔ وزیراعظم داہیت انا ستاءِ کرے کہ سی پیک ڈٹ جاٹ اٹی صوبہ غاتا نمائندگی مس و داہیت اہم ءِ تانکہ دا ڈٹ جاٹ آتا فائدہ بنجائی اکائی تیٹی بریبری وڑاٹ بشخ وپانٹ مرے۔
دیوان اٹی وزیر خزانہ سینیٹر اسحاق ڈار ، بنجائی وزیر دیر و بجلی خواجہ آصف ، بنجائی وزیر ڈٹ بندی و شونداری احسن اقبال ، وزیراعظم نا خصوصی کمکار طارق فاطمی، وزیراعظم نا سیکرٹری فواد حسن فواد و ایلو سینئر کمامدارآک ساڑی ئسر۔
