چلڈرن ہسپتال کوئٹہ کون آ ادارہ غاتا دوبننگ نعمت اسے آن کم اف، حاجی عبدالودود اچکزئی

کوئٹہ(پاکستان نیوز پوائنٹ 29نومبر2016ء) ایوان صنعت و واپار کوئٹہ بلوچستان نا صدر حاجی عبدالودود اچکزئی پارینے کہ بلوچستان کون آ پسماندہ صوبہ ٹی ہڑزان و دمدستی جان جوڑی نا آسراتی نا دوئی ٹی الس ءِ ہراڑے مشکل آتون مون تروئی تماکہ ہموڑے چلڈرن ہسپتال کون آ مثالی ادارہ غاک خذمت خلق انا جوزہ نا رداٹ الس کن اسہ نعمت اسے آن کم اف۔ داخیال آتا درشانی ءِ او تدوک آ دے چیمبر آف کامرس کوئٹہ بلوچستان اٹی چلڈرن ہسپتال کوئٹہ نا چیف ایگزیکٹو ڈاکٹر عبداللہ جان جعفر تون اوڑدہی نا وخت آ ہیت وگپ کرسا کرے۔

داوخت آ چیمبرآف کامرس کوئٹہ بلوچستان نا پیٹر ان چیف حاجی غلام فاروق ، سینئر باسک نیاز لالا، حاجی سرور آغا، جمعہ خان بادیزئی ، حاجی جانان اچکزئی، سید ظہور آغا، حاجی محمد ایوب، حاجی طالب و ایلو عہدیدار و باسک آک ہم ساڑی ئسر۔ ایوان صنعت و واپار کوئٹہ بلوچستان نا صدر حاجی عبدالودود اچکزئی ، پیٹران چیف حاجی فاروق تون اوار ایلوک چلڈرن ہسپتال کوئٹہ نا خذمت آتا ستاءِ کریر و پاریر کہ دا مثالی ادارہ غان چناتا بھلو کچ اسے ہردے نا بنداو آ درمان نا آسراتی ملنگ ءِ، ہرا ستاکڑزوک ءُ ہیت اسے دا خذمت خلق انا جوزہ نا رداٹ ہر کس کہ کاریم کے تو دا اونا ہڑتوم جہان تا سرسہبی نا ضامن ثابت مریک، بلوچستان کون آ پسماندہ صوبہ ٹی ہراڑے خلقت آتے جان جوڑی تعلیم، کنوئی ءُ صاف دیر تون اوار کیہی بنداوی گرج آک میسر افس، سی ایچ کیو کون اآ ادارہ غاتا دوبننگ نعمت اسے آن کم اف۔