اسلام آباد(پاکستان نیوز پوائنٹ 29نومبر2016ء) سنٹرل ڈویلپمنٹ ورکنگ پارٹی 36ارب روپئی مالیت نا 7 ڈٹ آتا منظوری ءِ تس۔ سے شنبے آ بنجائی وزیر ڈٹ بندی و شونداری احسن اقبال نا کماشی ٹی سنٹرل ڈویلپمنٹ ورکنگ پارٹی نا دیوان پلاننگ کمیشن اٹی مس۔ دیوان اٹی بنجائی و صوبائی حکومت آتا بڑزکو کمامدارآک ساڑی ئسر۔ دیوان اٹی صوبہ سندھ اٹی چناتے رکھی ٹیکہ خلنگ نا 8 ارب روپئی نا ڈٹ ءِ منظور کرے ۔
دا پروگرام آن چناتے 9ناجوڑی تیان بچفنگ کن ویکسین تننگک۔ دیوان اٹی خیبر پختونخوا ٹی 6.6ارب روپئی نا خڑچ آن چناتا قوت مدافعت ءِ ودفنگ کن رکھی ٹیکیہ غاتا ڈٹ ہم منظور۔ صوبہ بلوچستان اٹی 7.3ارب روپئی نا خڑچ آن رکھی ٹیکہ غاتا ڈٹ ءِ منظور کننگا۔ دیوان اٹی بہاولپور اٹی چناتے کن ہسپتال اسے نا جوڑ جاڑ نا 51کروڑ90 لکھ روپئی نا ڈٹ منظور کننگا۔ دیوان اٹی گوادر اٹی آخبت اٹی دیر انا کاختی ءِ مر کننگ کن 5ارب 7کروڑ 10لکھ روپئی نا خڑچ انا ڈٹ ءِ ہم منظور کرے۔
دیوان اٹی سکینڈری ٹرانسمیشن لین و گریڈ اسٹیشن نا 8 ارب 57کروڑ 20لکھ روپئی نا خڑچ آن ڈٹ ہم منظور کننگا۔ سی ڈی ڈبلیو پی پاکستان انسٹی ٹیوٹ آف میڈیکل سائنس (پمز) اٹی میڈیکل فضلہ زیان کننگ کن یونٹ نا اڈتننگ نا ڈٹ ءِ ہم منظور کننگا۔ پوسکن آ ٹیکنالوجی آن پُر دا یونٹ اٹی چاگڑد دوست وڑوڈول آتے اٹ ہسپتال نا فضلہ زیان کننگک۔ دیوان اٹی داکان بیدس مسہ پوزیشن پیپرز نا ہم منظور تننگا۔
