اسلام آباد۔(پاکستان پوائنٹ نیوز۔21 جولائی۔2016) صدر مملکت ممنون حسین پارینے کہ پاکستان دہشت گردی و انتہاء پسندی نا چیلنج تون مون تننگ اٹی سرسہب مسنے و داسا جہانی برادری پاکستان نا داغیر معمولی آزموندہ غان فائدہ ہرفنگ کیرہ۔ اوداہیت ءِ پنچ شنبے آ 41می نتھیاگلی سمر کالج نا شریک مروک آتا اعزاز اٹی اسہ ضیافت اسینا وخت آ ہیت وگپ کرسا پارے۔
داوخت آ پاکستان اٹامک انرجی کمیشن نا چیئرمین محمد نعیم و اندرون و بیرون ملک آن بروک آ سائنس دان و سمرکالج نا ایلو شریک مروک آک ہم شرکت کریر۔ صدر مملکت پارے کہ نتھیاگلی سمر کالج ننا سائنس دان تے کن بھاز فائدہ مند ءِ ہراڑآن پاکستانی سائنسدانک جہانی سائنسدان تا آزموندہ غاتیان فائدہ ہرفیرہ۔ اوپارے کہ پاکستان دنیا نا ہر ملک اتون پرامن و بقائے تین پہ تینی آ یخین تخک و تینا ہمسایہ غاتون اوار دنیا نا غٹ ملک آتون دوستانہ تعلقداری تا خواہش مند ءِ۔
اوپارے کہ انتہاء پسندی و عسکریت پسندی آن پاکستان ءِ غٹ آن زیات نسخان مسنے۔ اوپارے کہ داسا دا ویل دنیا نا ایلو بشخ آتے ہم زہمی کننگ ءِ ہرا گڑتی نا قابل ءِ۔ جہانی برادری دا چرجوئی ٹی ننا آزموندہ غاتیان فائدہ ہرفنگ کیرہ انتئے کہ پاکستان دا معاملہ ٹی غیر معمولی سرسہبی دوئی کرینے۔ اوپارے کہ دہشت گردی تون مون تننگ کن نن آپریشن ضرب عضب نا بناءِ کریسن ہرا سرسہب مسنے و نن داسال نا آخر اسکان نن عسکریت پسند آتا پوروی اٹ صفایا ءِ کینہ۔ تینا دا آزموندہ آن دنیا ءِ ہم فائدہ تننگ کینہ۔ صدر مملکت پارے کہ نن امن آ یخین تخنہ و سائنس نا شون ءِ انسانیت نا شرحالی کن کاریم اٹ ہتنگ خوانہ ۔
