اسلام آباد۔(پاکستان پوائنٹ نیوز۔21 جولائی۔2016) صدر مملکت ممنون حسین پارینے کہ ”ضرب عضب“ و کراچی آپریشن آن ملک اٹی امن وایمنی نا حالیت آک گچین مسنو، پاک چین اقتصادی راہداری ڈٹ انا نتیجہ ٹی ملک اٹی اقتصادی شون و سوگوی بریک و خلقت آتے زرکاری نا وارخواہی رسینگک۔ اوداہیت ءِ پنچ شنبے آ حفیظ خان نا سروکی ٹی پاک امریکہ بزنس فورم نا ڈل اتون ہیت وگپ کرسا پارے۔
صدر مملکت پارے کہ آپریشن ضرب عضب و کراچی آپریشن آخریکو دہشت گرد نا چٹفنگ و امن نا پورو بحالی اسکان برجاء سلک۔ صدر مملکت پارے کہ امن و ایمنی نا گچینی نا سوب درملکی زرکاری ٹی ودکی مسنے۔ اوپارے کہ پاکستان اٹی زرکاری کن بے پناہ وارخواہی ساڑی ءِ ہرافتے آن بین الاقوامی زرکارآک فائدہ ہرفنگ کیرہ۔ صدر مملکت پارے کہ ملک داوخت شون و شونہالی نا کسر آ روان ءِ واونا معیشت آخبت اٹی پین سوگو مریک۔
اوپارے کہ بین الاقوامی معاشی ادارہ غاک پاکستانی اقتصادی پالیسی و شون نا رفتار نا ستاءِ کرینے و پاکستان ءِ مون آ بروک آمارکیٹ آتا زمرہ ٹی اوڑدہ کرینے۔ صدر مملکت پارے کہ پاک چین اقتصادی راہداری آن زرکاری و شون اکن پوسکن ءُ کسر ملنگرہ و روزگار نا وارخواہیک ودی مریرہ۔ اوپارے کہ نیامی ایشیاء نا بھاز انگا ملک آک دا ڈٹ انا اہمیت ءِ چاھسا داڈٹ اتون منسلک مننگ نا خواہش نا درشانی ءِ کرینو۔
صدر مملکت پارے کہ پاکستان نا روشنا آخبت کن کرپشن نا چٹفنگ المی ءِ۔ شونداری ڈٹ آتے ٹی فنڈز انا نغڑدنگ آن ڈٹ بھاز بے وڑ زہمی مریک۔ اوالس ءِ زیات آن زیات فائدہ تننگ و شون اکن سرکاری فنڈانا جوان کاریم اٹ ہتنگ نا اہمیت ءِ تالان کرے۔ ڈل صدر مملکت ءِ پارے کہ پیشن نا ملک اٹی رہینگوک پاکستانیک ملک اٹی گچین امن و ایمنی و اقتصادی حالیت آتیا بھاز خوش ءُ وپاک چائنہ اقتصادی راہداری آن فائدہ ہرفنگ کن پاکستان اٹی زرکاری کننگ نا خواہش مند ءُ۔ داوخت آ ڈپٹی اسپیکر قومی اسمبلی مرتضیٰ جاوید عباسی ہم ساڑی ئس۔
