اسلام آباد(پاکستان نیوز پوائنٹ 14نومبر2016ء) وزیر مملکت اطلاعات ، نشریات و قومی میرات مریم اورنگزیب پارینے کہ کل پاکستانی قوم وطن نا دفاع کن سلہہ بند فوج اتون اوار سلوک ءُ۔ وطن نا دفاع کن جان قربان کروک آ شہید فوجی تے سلام پیش کینہ۔ ملکی دفاع آ ہچ ءُ سمجھوتہ اس کننگپک، بھارت لغور ءِ ہنداخاطران داوڑنا حرکت کننگ ءِ، کنٹرول لین آ بھارتی بلااشتعال سم کاری نا سختی اٹ مذمت ءِ کینہ ، ہر کہول آ بھارت ءِ پبی ورندی تننگ انگ ءِ ، ننا امن پسندی ءِ نزوری تکنگپ۔
، ہراوڑپاکستان نا فوج پبی ورندی تسنے اوڑآ کل قوم پاک فوج انا ورناتتون اوار سلوک ءِ۔ دوشنبے آ بھمبر اٹی کنٹرول لین آ بھارتی بیدادی ٹی 7پاکستانی فوجی تا شہیدی نا واقعہ غا نجی ٹی وی تون خصوصی ہیت وگپ کرسا اوکنٹرول لین آ بھارت نا بلااشتعال سم کاری نا ترندی اٹ مذمت ءِ کرے و پارے کہ ملک انا دفاع کن کل قوم سلہہ بند فوج اتون سلوک ءِ ، وطن نا شہید آتے خراج تحسین پیش کرسا وزیر مملکت پارے کہ وطن نا دفاع کن جان تروک آ قومی ہیرو تے مچ آ قوم سلام پیش کیک ۔
اوپارے کہ ننے پاک فوج آفخر ءِ ، پاک فوج بھارتی بیدادی نا پبی ورندی ءِ تسنے وقوم بھارتی بیدادی نا پبی ورندی ءِ تننگ کن تیار ءِ۔ وزیر مملکت اطلاعات و نشریات پارے کہ ایل او سی آ بھارتی بیدادی نا ورندی ٹی پاک فوج نا پبی کارروائی بھارت کن کلہو اسے کہ او دا حرکت آتیان مُر مرے انتئے کہ دا بیدادی نا نسخان بھارت ہی ءِ ہرفوئی تمک۔ بھارتی بیدادی نا معاملہ ءِ بین الاقوامی کہول آ چست کننگ نا بابت چست کروک آ سوج انا ورندیءِ ترسا اوپارے کہ بھارتی بیدادی نا معاملہ غا وزیراعظم محمد نواز شریف صلابت اٹ حکمت عملی اس مرتب کننگ ءِ۔
وزیر مملکت پارے کہ دا پاکستان نا دفاع نا معاملہ ءِ ہراڑآ ہچ وڑنا سمجھوتہ اس کننگپک۔ اوپارے کہ ہراوڑ لین آف کنٹرول آ پاک فوج بھارت ءِ پبی ورندی تس ہنداوڑ ہر کہول آ بھارت ءِ پبی ورندی تننگ انگ ءِ۔ وزیر مملکت پارے کہ ننا امن پسندی ءِ نزوری تکنگپ۔
