اسلام آباد(پاکستان نیوز پوائنٹ 14نومبر2016ء) وزیراعظم محمد نواز شریف بھارتی فوج انا کنڈآن لین آف کنٹرول آ تازہ اِنگا خلاف ورزی تیٹی قیمتی جان تا زیان آ افسوزنا درشانی ءِ کرسا پارینے کہ نن ہر بیدادی نا برخلاف لمہ وطن نا دفاع نا پبی لائخی تخنہ۔ دوشنبے آ وزیراعظم نا میڈیا ونگ نا کنڈآن جاری بیان نا رداٹ وزیراعظم محمد نواز شریف شہید مروک آ پاکستانی ورناتے زبردست خراج عقیدت پیش کرسا پارینے کہ دا ہیت بے کچ افسوزناک ءِ کہ ساڑی آ دے تیٹی بھارتی فوج لین آف کنٹرول آ سیز فائر معاہدہ نا پدریسہ خلاف ورزی ءِ کرینے۔
اوپارے کہ بھارتی فوج مقبوضہ کشمیر اٹی انسانی حق انا سنگین حالیت آتیان دنیا نا توجوہ ءِ اسہ پلو کننگ کن لین آف کنٹرول آ بے چیٹی ٹی ودکی کرینے۔ وزیراعظم پارے کہ بھارتی فوج مقبوضہ کشمیر نا کودک و بے گناہ بندغ آتا برخلاف ناقابل بیان بیدادی کننگ ءِ ، بھارتی کوزہ نا برخلاف مقبوضہ کشمیر نا الس بش مسنو و بھارتی حکومت نوشتہ دیوار ءِ خواننگ اٹی بے سہب مسنے۔ اوپارے کہ بھارتی فوج لین آف کنٹرول آ بے چیٹی ودی کرسا کشمیر نا ویل آن توجوہ ءِ اسہ پلو کننگ نا بے سہب کوشست کننگ ءِ۔ وزیراعظم محمد نواز شریف شہید آتا درجہ غاتا بڑزی کن دعا کرسا پارے کہ لمہ وطن نا دفاع کن تینا جان تا نذرانہ ءِ پیش کروک آتے ہمیشہ بے کچ شرف اتون یات تخنگک۔
