اسلام آباد(پاکستان نیوز پوائنٹ 8نومبر2016ء) خاتون اول بیگم محمودہ ممنون حسین پارینے کہ دودوربیدہ ہی میراث قوم انا شناخت مریک ہرادے قومی زمواری سرپند کرسا رکھ تروئی مرے۔ پاکستان متنوع و دلکش دودوربیدہ ہی میراث آن مالامال ءِ و اودے لوک روایت آتے بروک آ نسل آتسکان گدریفسا رکھوک جوڑ کننگ نا گرج ءِ۔ اوداہیت ءِ سے شنبے آ داڑے لوک ورثہ میوزیم اٹی روائتی ٹوکری جوڑ کننگ نا بارواٹی ہفت دے ئی تربیتی پروگرام اٹی مہمان خاص نا حیثیت آن تران کرسا پارے۔
بیگم محمودہ پارے کہ ہراقومک تینے تینا دودوربیدہ آن جتا کیرہ و اجنبی دودوربیدہ غاتا اندھادھند پیروی ءِ کیرہ۔ او اقوام عالم اٹی فخر اتون زندہ سلنگ کپسہ۔ اوپارے کہ دودوربیدہ ہی شناخت نا رکھ قوم انا پت ءِ جلا بخشاءِ و شون نا کسر آ روان کیک۔ خاتون اول غٹ صوبہ و علاقہ غاتا ہندی دودوربیدہ غاتے زیب دار انداز اٹی تالان کننگ آ لوک ورثہ نا ستاءِ کرے۔
اوپاکستانی دستکاری مصنوعات آتا بین الاقوامی منڈی تیٹی پبی تشہیر و اوفتا بہاکننگ ناگرج آ ہم زورشاغا ہراڑآن قیمتی درملکی زرمبادلہ ہم دوئی مریک۔ او پڑو کرے کہ لوک ورثہ 19آن 28دسمبر اسکان پچ انا بنائی نا بارواٹی بروک آ پروگرام نا انعقاد ءِ کیک ہراٹی مچ آ ملک آن روائتی دستی لوم نا بشخ اٹی پنی دستکارآتے چناتا تربیت کن مدعو کننگک۔ داکان گڈ بیگم محمودہ ممنون حسین صوبہ غاتیان متعلق دودوربیدہ ہی پروگرام پیش کروک آ طالب علم آتیٹی صفتی سند بشخ وپانٹ کرے۔
