اسلام آباد(پاکستان نیوز پوائنٹ 8نومبر2016ء) صدر مملکت ممنون حسین پارت کرینے کہ پسماندہ تپہ غاتا ناخواندہ چناتے تعلیم تننگ تون اوار اوار اوفتے معاشی وڑاٹ سوگو کننگ کن جامع ڈٹ انا رداٹ کاریم کننگے۔ صدر مملکت دا پارت ءِ قومی کمیشن انسانی شونداری (این سی ایچ ڈی) نا اسہ ڈل اسے تون ہیت وگپ کرسا تس۔ ڈل وزیر مملکت برائے بنجائی تعلیم و فنی تربیت انجینئر بلیغ الرحمان نا سروکی ٹی اوفتے تون اوڑدہی کرے۔
داوخت آ این سی ایچ ڈی نا چیئرپرسن گودی روزینہ عالم ہم ساڑی ئس ہراک صدر مملکت ءِ ادارہ نا سالانہ رپورٹ ءِ ہم پیش کریر۔ صدر مملکت تعلیم نا کچ اٹی ودکی کن این سی ایچ ڈی نا خذمت آتا ستاءِ کرسا پارے کہ خلقی آ علاقہ غاتیٹی تعلیم نا مون آ دننگ کن خذمت انجام تروک آ استاد آتے کانود نا رداٹ و ایلو سرکاری ملازم آتا بریبر معاوضہ غاتا ادائیگی بایدے مرے تانکہ اوفتا گرج آک ہم پورو مننگ کیر و تعلیم نا معیار ہم گچین مننگ کے۔
دامقصد کن تعلقدار ادارہ غاتے پارت کننگے کہ او حکومت پاکستان نا فیصلہ غاتارداٹ اوفتے غٹ المی آسراتی مہیا کے۔ صدر مملکت جیل آتیٹی بند چناو ناخواندہ بالغ آتے خواندہ جوڑ کننگ نا کوشست آتیا این سی ایچ ڈی نا ستاءِ کرے و پارے کہ طالب علم آتا تعلیم و تربیت آن تہذیبی پس منظر نا رداٹ کننگے تو او زیات گچین مریک۔ دا چرجوئی ٹی این سی ایچ ڈی نا کڑد سازی نا پروگرام بے کچ مفید ثابت مریک۔
