اسلام آباد(پاکستان نیوزپوائنٹ 23مارچ2018ء) متحدہ عرب امارات (یو اے ای) نا دستہ اولیکو وار یوم پاکستان نا وخت آ سلہہ بند فوج انا اسیجائی پریڈ اٹی شرکت کرے ہرا کہ پاکستان و پاکستان نا الس کن اسہ بھلو اعزاز اسے داڑآن پاکستان و یو اے ای نا نیام اٹ تعلقداریک شون ہلنگ ءُ۔ جمعہ نادے پریڈ گراؤنڈ شکرپڑیاں ٹی ہر مسٹ آ سلہہ بند فوج انا اسیجائی پریڈ اٹی اولیکو وار متحدہ عرب امارات (یو اے ای) نا سلہہ بند فوج انا دستہ خصوصی وڑاٹ شرکت کرے۔
صدر مملکت ممنون حسین پریڈ نا وخت آ تینا تران اٹی پارے کہ نن داپریڈ اٹی بشخ ہلوک آ متحدہ عرب امارات، ترکی و اردن نا دستہ غاتا گرم جوشی اٹ خیر مقدم ءِ کینہ۔ داحقیقت اٹ ہچ ءُ شک اس اف کہ جہانی امن و سلامتی کن ننا سنگتی و کمکاری بروک آ دے تیٹی پین شون ہلیک، ہندا ننا خارجہ پالیسی نا بنداو ءِ۔
