اسلام آباد(پاکستان نیوزپوائنٹ 23مارچ2018ء) وزیر مملکت اطلاعات، نشریات ، قومی تاریخ و ادبی میرات مریم اورنگزیب پارینے کہ پاکستان دہشت گردی نا برخلاف جنگ اٹی غٹ آن زیات قربانی تسنے، دا پاکستانی قوم انا لازوال قربانی تا بھرم ءِ کہ پاکستان دہشت گردی آن پاک مننگ ءِ و امن نا روشنائیک نظر بننگ ءُ، دہشت گردی نا برخلاف پاکستانی قوم انا جوزہ ستاکڑزک، نن قیام پاکستان آن ہلیس تعمیر پاکستان اسکان بھلو بھلو مزل عبور کرینن و اسہ شونہال ءُ پاکستان اس شون ہلسا مون آ بننگ ءِ ، دھرتی نا مارک و مسنک دامسخت نا خاطر تینا دتراٹ چراغ لگفینو، 23مارچ نا دے پاکستان کن تاریخی ءُ اہمیت اس تخک ، اینو نا دے دا عہد کننگ نا گرج ءِ ملک انا تعمیر و شونداری ٹی تینا کڑد ءِ ادا کینہ، واہم اواری اٹ و یکجا مرسا پیار و مابت نا موم بتی لگفنہ و پاکستان ءِ امن نا جاگہ اس جوڑ کینہ، پاکستانی قوم یکجا مرسا مدام مثالی کارنامہ سرانجام تسنے و سرسہب مسنے ، بے سگ کون آ عفریت آن خلاصی کن اخوت و سویت و ایلمی نا گرج ءِ ، قوم انا چناتا تعلیم و تربیت نا کاریم ننا غٹ انا اسیجائی زمواری ءِ، پاکستان سویٹ ہوم نا رکنیت سازی نا بابت الس اٹی آگاہی ودی کننگ کن پی ٹی وی بروک آ ہفتہ اسہ مہم اسے نا بناءِ کیک۔
جمعہ نا دے داڑے پاکستان سویٹ ہومز اٹی یوم پاکستان نا بابت ”پاکستان ڈے پریڈ“ نا دود آن تران کرسا وزیر مملکت اطلاعات و نشریات مریم اورنگزیب پارے کہ 23مارچ یوم پاکستان نا دے تاریخی ءُ اہمیت اس تخک ہرادے قرارداد پاکستان منظور مسوسس و علامہ اقبال نا تغ انا تعبیر کن قائد اعظم محمد علی جناح تحریک نا بنداو ءِ تخا و ہر بندغ داٹی تینا کڑد ءِ ادا کرے و تحریک نا سرسہبی آن پاکستان جوڑ مس۔
اوپارے کہ اینو پاکستان سویٹ ہومز انا چناتے تون اوار مننگ آن بیدس عہد کننگ نا ہم گرج ءِ کہ نن غٹ تینا زند اٹ دا چناتے اوار کین ہرافتا لمہ وباوہ دہشت گردی ٹی یا ہندن لمہ و باوہ ہرافتا چناک دہشت گردی نا جنگ اٹ شہید مسنو، اوفتے تینا زند اٹ اوار کننگے۔ اوپارے کہ ای ہراتم پاکستان سویٹ ہومز آ بریوہ تو کنا ہچ ءُ سیاسی وابستگی اس مفک انتئے کہ قوم انا چناتا تعلیم و تربیت نا کاریم ننا غٹ انا اسیجائی زمواری ءِ ۔
اوپارے کہ زمرد خان پرعزم ءِ و اونا ٹیم، ڈونرزو سول سوسائٹی نا کوشست آک ستاکڑزرہ ہراڑآن پاکستان سویٹ ہومز اٹی ہزار آ چناک تعلیم و تربیت حاصل کننگ ءُ۔ دود اٹی پاکستان سویٹ ہومز انا چناک شاندار پریڈ نشان تسر و وزیر مملکت اطلاعات و نشریات، قومی تاریخ و ادبی میرات ءِ سلامی پیش کریر۔ دود اٹی چندی زند انا بشخ آتیان تعلق تخوک آ بندغ آک ساڑی ئسر۔
