اسلام آباد(پاکستان نیوز پوائنٹ 30اگست 2016ء) وزیراعظم محمدنواز شریف پارینے کہ ملک اٹی لوڈشیڈنگ نا ہمیش ہمیش کن خاتمہ ءِ کننگک، بجلی نا برجاء ڈٹ آتا پوروی آن نیشنل گریڈ اٹی وافر کچ اٹی بجلی اوار کننگک۔ داخیال آتا درشانی ءِ او سے شنبے آ وزیراعظم ہاؤس اٹی کابینہ کمیٹی برائے توانائی نا دیوان نا کماشی ءِ کرسا کرے۔ دیوان اٹی دیر و بجلی نا بنجائی سیکرٹری یونس ڈھاگہ ملک اٹی بجلی نا برجاء ڈٹ آتا پوروی مدت نا بارواٹی بریفنگ تس۔
وزیراعظم ءِ پاننگاکہ بجلی نا برجاء ڈٹ آتے مارچ 2018 ء اسکان پورو کننگک۔ وزیراعظم ہاؤس آن برجاء کروک اسہ بیان اسے ٹی پاننگا کہ تخو ک آ مداٹی تھری ایل این جی پاور پلانٹ (بھیکھی) ، حویلی ، بہادر ، بلوکی 3600 میگاواٹ، چشمہ تھری و فور نیو کلیئر (340) میگاواٹ فی ڈٹ، گدوگیس400 میگاواٹ پلس ، نندی پور گیس100 میگاواٹ پلس، ساہیوال کول (1320) میگاواٹ ، چندی ونڈ بگاس(350) میگاواٹ ، پترنڈ ایچ بی پی ہائیڈل (147) میگاواٹ م، فیصل آباد گیس (250) میگاواٹ ، نیلم جہلم (969) میگاواٹ و تربیلا ودیکی چار (1410) میگاواٹ و پورٹ قاسم پاور پلانٹ (1320) میگاواٹ دا ڈٹ آتے ٹی اوارے۔
دیوان اٹی پاننگاکہ مارچ 2018 ء اسکان جمی وڑاٹ 11ہزار 131میگاواٹ بجلی نیشنل گریڈ اٹی اوار کننگک۔ دیوان ءِ داہم پاننگاکہ غٹ برجاء ڈٹ آتا رداٹ ٹرانسمیشن لین نا ڈٹ آن ٹریک ءِ۔ داڈٹ آتیا بھلو زرکاری اس کننگانے، ودکی بجلی نا فراوانی آن ڈسٹری بیوشن نیٹ ورک گچین وڑاٹ لوڈشیڈنگ نا خاتمہ کن بجلی نا بشخ وپانٹ آ عملدرآمد کننگ کیک۔ وزیراعظم پارے کہ ملک انا تاریخ اٹی مہالو وخت اس ہم توانائی نا بشخ اٹی داخہ در بھلو زرکاری اس متنے۔
اوپارے کہ حکومت صرف توانائی ناکاختی ءِ پورو کننگ آ ہی توجوہ تفننگ ءِ بلکن آخبت اٹی بجلی نا طلب ءِ پورو کننگ نا بابت گام گیج کننگ ءِ۔ وزیراعظم پارے کہ بجلی نا پیداوار اٹی ودکی آن اقتصادی شون ، روزگار نا وارخواہی نا فراوانی ، صنعتی سرجزآتیٹی ودکی و درملکی زرکاری نا وارخواہی تے ہم مون آ دننگ دوئی مریک۔ وزیراعظم پارے کہ ملک اٹی غٹ جاری بجلی نا ڈٹ آتا بروخت پوروی کن او تینٹ چاروکی ءِ تا کیک و موقع غا ہنسا دا ڈٹ آتا جاچ ءِ ہم ہلیک۔ دیوان اٹی وزیر خزانہ اسحاق ڈار ، وزیر پٹرولیم شاہد خاقان عباسی، وزیر دیر وبجلی خواجہ محمد آصف ، وزیراعلیٰ پنجاب محمد شہباز شریف، وزیراعظم نا خصوصی کمکار طارق فاطمی و سینئر کمامدار آک شرکت کریر۔
