صدر مملکت ممنون حسین نا طارق فاطمی و فاروق حیدر خان تون ہیت وگپ

صدر مملکت ممنون حسین نا طارق فاطمی و فاروق حیدر خان تون ہیت وگپ

اسلام آباد(پاکستان نیوز پوائنٹ 30اگست 2016ء) صدر مملکت ممنون حسین کشمیری تا سیاسی، سفارتی و اخلاقی کمک ءِ برجاء تخنگ نا عزم انا اعادہ کرسا پارے کہ مقبوضہ کشمیر اٹی بھارت نا کنڈآن انسانی حق انا خلاف ورزی تا کنڈا دنیا نا توجوہ ءِ مبذول کرفنگ کن گچین سفارتکاری نا گرج ءِ، کشمیر نا ویل انا ایسری آن بیدس ڈیہہ ٹی امن وخت اس ہم حقیقت مننگ کپک۔

او داہیت ءِ وزیراعظم نا خصوصی کمکار خارجہ امور طارق فاطمی و زیراعظم آزاد جموں و کشمیر محمد فاروق حیدر خان تون ہیت وگپ کرسا پارے ہراک سے شنبے آ ایوان صدر اٹی اوڑتون جتا جتا اوڑدہی کریر۔ صدر مملکت راجہ محمد فاروق حیدر خان ءِ وزیراعظم گچین مننگ آ مبارکبادی تس و دا اومیت نا درشانی ءِ کرے کہ اونا سروکی ٹی السی نمائندہ غاک خلقت آتا بے لوث خذمت ءِ کیرہ۔

صدر مملکت آزاد کشمیر اٹی الیکشن نا سرسہب اڈتننگ آ است جمی نا درشانی ءِ کرے۔ صدر مملکت پارے کہ آزاد کشمیر اٹی پوسکنا حکومت نا اولیت خلقت آتے بنداوی آسراتی کروئی ءِ تانکہ الس نا زند انا معیار گچین مننگ کے۔ دا چرجوئی ٹی غٹ السی ڈٹ آتیٹی شفافیت نا معیار ءِ گچین کننگ المی ءِ۔ داوخت آ وزیراعظم آزاد کشمیر صدر مملکت ءِ الس نا گچینی کن کروک آ گام گیج آتا بابت معلومدار کرے و دا عزم انا درشانی ءِ کرے کہ او الس نا شرحالی کن کاریم کیک۔ صدر مملکت پارے کہ ہر بین الاقوامی فورم آ کشمیر نا ویل ءِ تالان کروئی مرے۔ اوڑدہی ٹی وزیراعظم نا خصوصی کمکار خارجہ امور بین الاقوامی حالات و ڈیہہ نا حالیت آتیا صدر مملکت ءِ بریفنگ تس۔