پاکستان و روس انا نیام اٹی واپار و زرکاری آمبنی کمکاری ٹی ودکی مننگ ءِ ، سی پیک نا پوروی آن تین پہ تینی اقتصادی رابطہ و زرکاری ٹی پین ودکی مریک ، روس انا واپاری ڈل انا پوریاگر و صنعت کار برادری نا ڈل اتون اوڑدہی ٹی ہیت و گپ

اسلام آباد(پاکستان نیوزپوائنٹ12اکتوبر2017ء) پاکستان و روس ا نا واپاری و زرکاری نا تین پہ تینی کمکاری ٹی ودکی مننگءِ و روسی زرکار آک پاکستان اٹی زرکاری ٹی بھاز است خواہی تخرہ،پاک روس واپاری تعلقداری تا مون نا دننگ کن بینکنگ نا براہ راست آسراتی تیٹی ودکی و واپاری ڈل انا تین پہ تینی ہن بر ناگرجءِ ، روس انا واپاری ڈل انا سروک یوری کوز لوف نا تینا دورہ پاکستان نا وخت آ پوریا گر و صنعت کار برداری نا چندی ڈل آتون اوڑدہی ٹی پارے کہ روس انا زرکار آک پاکستان اٹی توانائی ،جوڑجاڑ،صنعت ،کانڑ کنی ، ریلوے انجینئرنگ ،میٹلرجی ،داروتا جوڑکننگ، جراحی ازباب آتا تیاری ، ایل ای ڈی لیٹ آتا تیاری ،کھد و کیمیکل نا صنعت آ تون اوار چندی بشخ آتیٹی زرکاری نا خواہش مند ءِ ،او پارے کہ چین پاکستان اقتصادی راہداری ڈٹ (سی پیک) نا پوروی آن پاکستان و روس انا تین پہ تینی اقتصادی رابطہ و زرکاری ٹی پین ودکی مریک ، ہراڑآن ڈیہہ ٹی اقتصادی شونداری ٹی کمک تون اوار اوار شونہالی ٹی ہم ودکی مریک ۔