کوئٹہ(پاکستان نیوزپوائنٹ11اکتوبر2017ء) چیئرمین نیب جسٹس (ر) جاوید اقبال پارینے کہ ملک اٹی کرپشن نا چٹفنگ کن ایمانداری اٹ کاریم کننگ تون احتساب نا کلچر ءِ مون آ دننگ ومیرٹ آ فیصلہ کننگ نا گرج ءِ۔ غٹ جماعت آک بطور چیئرمین نیب کنا پن آ امنا کرسا کنا زی آ ہرا پت انا درشانی ءِ کرینو اوڑآ اللہ تعالیٰ نا شکر ءِ ادا کرسا تینا زمواری تے جوان وڑ اٹ پورو کیوہ۔
بلوچستان نا حسین و تابندہ روایت و کلچر کنے مدام یات مریک۔ داخیال آتا درشانی ءِ او چارشنبے نادے عہدہ نا چارج ءِ سنبھالنگ آن پد ”اے پی پی“ تون ہیت وگپ کرسا کرے۔ چیئرمین نیب جسٹس (ر) جاوید اقبال پارے کہ بلوچستان نا مِش و گل زمین نا کنے آ کڑز مسنے زند اٹی ہراوخت آ کہ موقع ملا دا کڑز ءِ پورو کننگ نا حق ءِ ادا کیوہ۔ اوپارے کہ اسلامیہ ہائی اسکول کوئٹہ نا استاد و تینا لمہ و باوہ نا دعاتا سوب اینو دا ہند آٹی اُٹ ہراڑآ اللہ تعالیٰ نا شکر ءِ ادا کیوہ ، چیئرمین نیب پارے کہ ٹیم ورک و کانود نا رداٹ تینا فرض منصبی ءِ سرانجام ایتیوہ۔
جسٹس (ر) جاویداقبال پارے کہ ای کوئٹہ نا اسلامیہ ہائی اسکول اٹی زیر تعلیم مسونٹ و تینا استاد لمہ و باوہ و راج انا بے سیبو بندغ آتا دعا تا سوب ہراوخت آ کہ کنے زمواری اس تننگا تو اللہ تعالیٰ نا ذات آ متوکل و پورو بھروسہ کرسا ایمانداری و خوداعتمادی اٹ جوانی اٹ تینا خذمت ءِ سرانجام تسونٹ۔ بطور چیئرمین ہم تینا زمواری تتون جوان وڑاٹ مون تننگ کن تینا غٹ تر لائخی تے کاریم اٹ اتیوہ۔
