اسلام آباد(پاکستان نیوزپوائنٹ11اکتوبر2017ء) دفترخارجہ نا ترجمان نفیس ذکریا پارینے کہ پاکستان ورناانگا مسن و زالبول آتے راجی ، سیاسی ، اقتصادی و کانودی لحاظ اٹ بااختیار جوڑ کننگ کن نمان گام گیج کرینے، پاکستانی مسن و بالعموم مچ آ دنیا نا مسن تا سرسہبی تیا فخر ءِ و اوفتے خراج تحسین پیش کینہ۔ ننا مسن تا سرسہبی اوفتا عزم و ولولہ غاتا عکاس ءِ۔
ورناانگا مسن و زالبول نا رکھ ، اوفتے بااختیار جوڑ کننگ و اوفتے شونداری نا اسہ وڑ وارخواہی فراوان کننگ کن پرعزم اُن۔ چار شنبے نادے مسن تا جہانی دے انا مناسبت آن جاری اسہ بیان اسے ٹی دفترخارجہ نا ترجمان پارے کہ پاکستان نا ہر مسڑ نا تعلیم دوئی کننگ نا حق آ سختی اٹ کاربند ءِ ،نن داہیت آ باور کینہ کہ تعلیم سگ انا اقدار ءِ مون آ دننگ و شونداری و شونہالی کن کسر ءِ آوار کیک۔
جہانی دے انا وخت آ ترجمان داعزم انا اعادہ ءِ کرساپارے کہ پاکستان ہر مسڑ ءِ رکھ و شونداری نا حق آ کاربند سلک۔ حکومت پاکستان ہروڑنا استحصال نا چٹفنگ کن چندی ادارہ جاتی و کانودی گام گیج کرینے و اوفتے کن شونداری و ایکسلینس نا وارخواہی فراوان کننگ ءِ۔ ساڑی آ سال تیٹی لس زند اٹی مسن تا شرکت اٹی نمان ودکی مسنے۔ ترجمان پارے کہ پاکستان ملک اٹی چناخاص کر مسن تا تعلیم کن سازگار چاگڑد ءِ المی جوڑ کننگ نا غرض اٹ ہر کہول آ پالیسی و پروگرام جاری تخک۔ ترجمان پارے کہ سیاسی سرکڑدہ ہی نا کڑد مرے، سفارتی یا فوجی ، پاکستانی مسنک زند انا ہر بشخ اٹی نمان خذمت سرانجام ایترہ۔
