اسلام آباد(پاکستان نیوزپوائنٹ11اکتوبر2017ء) وزیر خارجہ خواجہ محمد آصف پارینے کہ پاکستان نا سلہہ بند فوج دہشت گردی نا برخلاف جنگ اٹی بے کچ اہم ءُ کڑد ادا کرینے ، سلہہ بند فوج دہشت گردی نا برخلاف جنگ اٹی بے پناہ قربانی تسنے و فاٹا تون اوار چندی علاقہ غاتیٹی سرسہبی اٹ امن ءِ بحال کرینے۔ چارشنبے نادے اسہ انٹرویو اسے ٹی اوپارے کہ ملک آن دہشت گرد آتا صفایا ءِ کننگ کن قومی ایکشن پلان غٹ سیاسی جماعت آتا امنائی اٹ تیار کننگاسس۔
اوپارے کہ ملک ءِ مون تروک چیلنج آتون مون تننگ کن قومی یکجہتی نا اظہار ہر شاری نا زمواری ءِ۔ اسہ سوج اسے ناو رندی ءِ ترسا وزیر خارجہ پارے کہ پاکستان اوغانستان اٹی امن و استحکام خواہک۔ پاکستان ڈیہہ ٹی امن کن امریکہ نا پارٹنر ئس، جمہوریت ءِ سوگو کننگ نا مطلب پاکستان ءِ سوگو کننگ نا ءِ۔ اوپارے کہ توانائی تنکی نا مون ءِ توننگ آن بیدس پاکستان ہر بشخ اٹی شون ہلنگ ءِ ، دسمبر نا اخیر اسکان کیہی پاور پلانٹ آک آپریشنل مریرہ ہراڑآن ملک اٹی لوڈشیڈنگ اٹی پین کمتی بریک۔ خواجہ آصف پارے کہ پاکستان مسلم لیگ (ن) کارکڑد و شونداری کاریم تا بنداو آ بروک آ لس گچین کاری تیٹی بشخ ہلیک۔
