اسلام آباد(پاکستان نیوز پوائنٹ 23اگست 2016ء) وزیراعظم محمد نواز شریف پارینے کہ دہشت گردی آخریکو دم تے ہلنگ ءِ ، بدامنی زوت اسے اٹ چٹک، اینو لوڈشیڈنگ کم انگا کہول آٹی ءِ، 2018 ء نا سال لوڈشیڈنگ فری سال مریک، ملک اٹی روڈ و موٹرویز آتا جال اس شاغنگ اُن، اقتصادی حالیت آک گچین مسنو، کبینی کم ، روپئی سوگو ، زرمبادلہ نا کوڑی ریکارڈ کہول آٹی ءِ ، 2018 ء نا گچین کاری تیٹی ولدا موقع ملا تو جی ڈی پی نا کچ نمو 12درسد اسکان دینہ، نن ہمیش ایلوفتا مینڈیٹ نا شرف ءِ کرینن و غٹ ءِ اوار درسا ہنانن، وخت اس ہم دھاندلی ، ہیرا پھیری یا 35پنکچر نا ہیت ءِ کتنن، دھاندلی نا دوبہ خلوک آتے تینا زنچک اٹی ہروئی مرے۔
او سے شنبے آ برآمد کنندگان اٹی سیلز ٹیکس ریفنڈ نا چیکس بشخ وپانٹ کننگ نا دود آن تران کریکہ۔ بنجائی وزیر خزانہ سینیٹر اسحاق ڈار ، وزیراعظم نا خصوصی کمکار ریونیو ہارون اختر خان، چیئرمین ایف بی آر نثارمحمد خان و ایوان ہائے صنعت و واپار پاکستان(ایف پی سی سی آئی ) ءِ، دہشت گردی آخریکو دم تے ہلنگ ءِ و ہراتم گڑاس داحالیت اٹی مرے تو گڑانہ گڑا کاریم اس نشان تننگ نا کوشست کیک۔
ملک اٹی زوت اسے اٹ بدامنی چٹک و امن اڈ ہلیک ہرانا نتیجہ ٹی اقتصادی سرجزوآک مون آ کارہ، ملک اٹی زرکاری مریک، برآمدات آک ودرہ ، قومی کٹیا ٹی ودکی مریک، پوسکن ءُ کارخانہ لگک و خلقت آتے کن روزگار نا وارخواہی ودی مریک۔ اوپارے کہ اللہ نا شکر ءِ کہ پاکستانی قوم نا دعاک قبول مننگ ءُ، ملک اٹی اقتصادی حالیت آک گچین مننگ ءُ ہرادے پین گچین جوڑ کننگ کن کوشست آتے ترند کروئی مرے۔
وزیراعظم پارے کہ اقتصادی شون اکن توانائی اہم گرج اسے، دامقصد کن بجلی نا پیداوار نا کیہی ڈٹ آتیا کاریم کننگ انگ ءِ، تھر اٹی کارخانہ غاک لگنگ ءُ ، اوڑآ 65سال مست بایدے کاریم نا بناء مروسس واہم داسا ننا حکومت نا ڈٹ آتا نتیجہ ٹی کولانا کوڑی نا کاریم اٹ بناء مننگ والا ءِ ۔ تھراٹی بڑزکو معیار نا کولا ارے ہراڑآن ہڑزان بجلی ودی مریک و اونا اُرائی صارف و کشارگر آتے ہم فائدہ مریک۔
وزیراعظم پارے کہ ہراتم نن حکومت ءِ سنبھالان تو اقتصادی بحالی، دہشت گردی و بجلی نا تنکی تون اوار ویل آتا مون تروکی ئس، گچین کاری تیٹی سرسہبی آن گڈ نن دا ویل آتا ایسری کن سنجیدہ ہیت وگپ نا بناءِ کرین۔ چین ۔پاکستان اقتصادی راہداری ڈٹ آن بیدس توانائی نا ایلو کیہی ڈٹ ہم خلنگ انگ ءِ ، داڈٹ آتیا کاریم نا رفتار آن چینی چاہندار آک ہم حیران ءُ۔
اوپارے کہ 1990 ء نا دہائی ٹی نن تون بجلی وافر ئس، 1999ء آن 2013ء اسکان بجلی نا پوسکن ءُ ڈٹ خلنگ آ ہچ ءُ کاریم اس متو، نن اپوزیشن ٹی مرسا ہم 2008 ء آن 2013ء اسکان پیپلز پارٹی نا حکومت تون بارواٹی سوج کرسا کرینن کہ اودے دا ویل میراث اٹی ملانے تو او اونا زمہ وار آتیان ہریفے کہ مجرمانہ ڈیوالائی انت اکن کننگا۔ اوپارے کہ 2013ء ٹی ننا حکومت جوڑمس تو دا ویل ءِ ایسر کننگ کن ولدا کاریم نا بناءِ کرے۔
وزیراعظم نواز شریف پارے کہ گیس انا کمتی ءِ پورو کننگ کن ہم کاریم کننگ انگ ءِ و تاپی ڈٹ انا پوروی آن بروک آ سال تیٹی گیس انا کمتی مُر مریک۔ اوپارے کہ اینو ملک اٹی موٹرویز و روڈ آتا جال اس شاغنگ انگ ءِ ، میٹروبس و اورنج لائن ٹرین جوڑ مننگ ءِ ، ریلویز گچین مننگ ءِ ، پی آئی اے بروک آ اِراسال ٹی گچین ایئرلائن اس جوڑ مریک۔ وزیراعظم پارے کہ سی پیک نا رداٹ روڈ و موٹرویز آتا ڈٹ پوروی نا مرحلہ غاتیٹی ءِ، کراچی آن حیدرآباد شش رویہ موٹروے بروک آ سال پورو مریک، حیدرآباد آن سکھر اسکان موٹروے نا جوڑ جاڑ کن پیسہ غاتا بست و بند کننگ انگ ءِ وخت اس کہ لاہور آن سکھر موٹروے آ کاریم شرو ع ءِ ، گوادر آن کوئٹہ و ولدا خیبر پختونخواہ اسکان موٹروے جوڑ مننگ ءِ ، ہنداوڑ خنجراب ۔
گلگت بلتستان۔ مانسہرہ ۔ حسن ابدال موٹروے جوڑ کننگ انگ ءِ ، آزاد کشمیر اٹی ہم ننے مینڈیٹ ملانے، نن آزاد کشمیر نا شون ءِ خوانہ و اونا ہم نقش بدلینگک، گلگت بلتستان اٹی کاریم مننگ ءِ ، ننا نظر بجلی، انفراسٹرکچر ، دہشت گردی و امن و ایمنی تون اوار ہر بشخ آ نظر ءِ۔ اوپارے کہ اسہ وختس ئس کہ خلقت آک لوڈشیڈنگ نا برخلاف روڈآتیا ئسر ، ہر کنڈ تہاری ئس ولے اینو لوڈشیڈنگ کم انگا کہول آٹی ءِ ، وخت بننگ والا ءِ کہ ملک اٹی ہچ ءُ لوڈشیڈنگ اس مفک و 2018 ء نا سال لوڈشیڈنگ فری سال مریک۔
وزیراعظم پارے کہ ننا حکومت ہڑزان بجلی ودی کننگ نا ڈٹ آتیا کاریم کننگ ءِ، ایل این جی نا مسہ ڈٹ آتیٹی ایمانداری و شفافیت آن سد ارب روپئی نا بچت کننگانے، ہرا پاکستان اٹی اسہ مثال اسے۔ وزیراعظم پارے کہ حکومت است وجان تون و خواری اٹ کاریم کننگ ءِ، پوریاگر و زرکار آک داخیر انا کاریم اٹی حکومت تون تفر۔ اوپارے کہ نن ایلوفتا مینڈیٹ نا ہمیش شرف ءِ کرینن، نن وخت اس ہم دھاندلی ، ہیرا پھیری یا 35پنکچرز نا ہیت ءِ کتنن، پیپلز پارٹی تون بھاز جوان چاگڑد اٹی انتقال اقتدار ءِ سرانجام تننگا تانکہ دنیا ءِ معلوم مرے کہ پاکستان اٹی اسہ نظام اسے، جمہوریت ءِ ، آئین و کانود نا پاسداری مننگ ءِ و اسہ ایلو نا مینڈیٹ ءِ امنا کننگ انگ ءِ۔
اوپارے کہ دھاندلی نا دوبہ خلوک آک تینا زنچک اٹی ہلیر ہریر کہ اوفتے ٹی انت کمتی اسے۔ اوپارے کہ آزاد کشمیر نا گچین کاری تا نتیجہ ہم غٹ انا مون آٹی ءِ۔ وزیراعظم پارے کہ 2013ء نا گچین کاری تیان گڈ نن سندھ اٹی پیپلز پارٹی و خیبر پختونخواٹی پاکستان تحریک انصاف نا مینڈیٹ ءِ امنا کرینن و اودے بدل کننگ نا کوشست کتون۔ خیبرپختونخوا ٹی نن خوائسنہ تو تینا حکومت ءِ جوڑ کننگ کرینہ۔
وزیراعظم پارے کہ نن غٹ جماعت آتے اوار دننگ نا پالیسی ءِ اختیار کرین ۔ جون 2013ء ٹی وزیراعظم نا حیثیت اٹ سوغند ہرفیٹ و ستمبر 2013ء ٹی غٹ انا پورو اتفاق رائے آن کراچی ٹی آپریشن نا بناءِ کرین۔ داوخت آ وزیراعظم پارے کہ قومی محصولات 3100 ارب روپئی آن تجاوز کرینو ، داکارکڑد نا سہرا وزیرخزانہ اسحاق ڈار و اونا ٹیم ءِ کاہک۔ اوپارے کہ سیلز ٹیکس ریفنڈ نا ادائیگی 31اگست 2016ء اسکان کروئی ئس ہراداڑآن مست پورو مننگ ءِ، ہنداوڑ حکومت اسہ پین وعدہ اس پورو کرینے۔
اوپارے کہ برآمدات آتا بشخ آتے 20 جون 2016ء اسکان منظور کروک آ ریفنڈ زوت واپس کننگک۔ داوخت آ وزیراعظم پڑو کرے کہ 15اکتوبر 2016ء اسکان غٹ سیلز ٹیکس ریفنڈ ادا کننگرہ۔ اوپارے کہ ٹیکس آتا کچ بایدے کم مرے ، داننا پالیسی ٹی اوارے۔ اوپارے کہ ملکی اقتصادی حالیت آک بھاز جوان ءُ، کبینی کم مسنے، زرمبادلہ نا کوڑی ریکارڈ کہول آ سرمسنے، روپئی سوگو ءِ ، جی ڈی پی گروتھ پدریسہ گچین مننگ ءِ و 2018 ء اسکان جی ڈی پی نا کچ نمو 6 درسد بایدے ضرور مرے۔ اوپارے کہ ننے دُوارہ موقع ملا تو بروک آ پنچ سال آتیٹی جی ڈی پی نا کچ ءِ 12درسدکان دینہ۔
