راولپنڈی۔(پاکستان نیوز پوائنٹ 23اگست 2016ء) بری فوج انا سروک جنرل راحیل شریف پارینے کہ مچ آ ملک اٹی دہشت گرد آتا برخلاف بے پرخ آپریشن برجاء سلک، اسہ دہشت گرد اسے ہم ملک انا گل زمین ءِ ایلو ملک انا برخلاف کاریم اٹ ہتنگ نا ہرگز موکل تفننگک۔ فاٹا ٹی دہشت گرد آتا برخلاف سرسہب آپریشن نا سوب حالیت آک بھلو حد اسسکان گچین مسنو۔ او سے شنبے آ کرم ایجنسی (ٹل ) انا دورہ نا وخت آ خیال آتا درشانی ءِ کریکہ۔
پاک فوج انا شعبہ تعلقات عامہ (آئی ایس پی آر) نا رداٹ آرمی چیف جنرل راحیل شریف کرم ایجنسی نا دورہ ءِ کرے ہراڑے پاک فوج دہشت گرد آتا برخلاف کومبنگ آپریشن اٹی اختہ ئسر۔ آپریشنل کمانڈر آرمی چیف ءِ کرم ایجنسی نا سیکورٹی حالیت خاص کر ہموڑے برجاء پاک فوج انا کومبنگ آپریشن و آپریشن بیسڈ آپریشن نا بابت آن سرجمی اٹ احوال تس۔ آرمی چیف کرم ایجنسی ٹی برجاء کومبنگ آپریشن نا جمی پیش رفت آ است جمی نا درشانی ءِ کرے ہرانا نتیجہ ٹی دا علاقہ غاتیٹی سیکورٹی حالیت آتیٹی گچینی بسنے۔
اودہشت گرد آتا آپریشن نا کمک اٹ صفایا ءِ کننگ آ بہادر فوجی تا عزم انا ستاءِ کرے۔ آرمی چیف پارے کہ متحرک و فعال آپریشن نا کمک اٹ فاٹا ٹی امن قائم کرینو۔ اوزورشاغا کہ دہشت گرد آتا اودیم ٹھکانہ ، سلیپر ز سیل و کمکار آتا برخلاف مچ آملک اٹی بے پرخ آپریشن برجاء سلک و پاکستان وخت اس ہم دہشت گرد آتے تینا گل زمین ءِ پین اسے ملک اسے نا برخلاف کاریم اٹ ہتنگ نا موکل تفک۔
جنرل راحیل شریف سیمی بست وبند انا گچینی کن پوسکنا تعیناتی و ڈھانچہ نا جاچ ءِ ہلک و پارت تس کہ اوغانستان اٹی ریزلوٹ سپورٹ مشن (آر ایس ایم ) و اوغان نیشنل سیکورٹی فورس انا کمک اٹ سیم پار ہن و بر نا پورو و گچین چاروکی کن گام گیج چست کننگے۔ آرمی چیف جنرل راحیل شریف ہراتم کرم ایجنسی آ رسینگا تو کورکمانڈر پشاور لیفٹیننٹ جنرل ہدایت الرحمان اودے بخیر کرے۔
