اسلام آباد۔(پاکستان نیوز پوائنٹ 23اگست 2016ء) صدر مملکت ممنون حسین پارینے کہ ملک اٹی غٹ مسالک آتا نیام اٹ امن وایمنی ایلمی نا چاگڑد ودی کننگ کن عالم دین و دانشور آک تینا کڑد ءِ ادا کیر۔ اوداخیال آتا درشانی ءِ سے شنبے آ ایوان صدر اٹی ڈاکٹر سید نامفضل سیف الدین نا سروکی ٹی داؤدی بوہرہ برادری نا ڈل اتون اوڑدہی نا وخت آ کرے۔ صدر مملکت پارے کہ غٹ مکاتب فکر انا نیام اٹ رواداری و تین پہ تینی شرف نا رشتہ بایدے مرے و مذہبی ہم آہنگی نا مون آ دننگ کن کوشست آتے برجاء تخوئی مرے۔
اوپارے کہ ننا غٹ انا زمہ واری جوڑ مریک کہ ملک اٹی امن و شونہالی کن ایلمی نا چاگڑد ءِ ودی کین۔ صدر مملکت ملک اٹی واپاری سرجزآتے ودفنگ اٹی بوہرہ برادری نا ستاءِ کرے و تعلیم، جان جوڑی و ملک انا الس نا گچینی کن کروک آ گام گیج آتا چرجوئی ٹی داؤدی بوہرہ جماعت نا خذمت آتا ستاءِ کرے۔ صدر مملکت ڈاکٹر سید نامفضل سیف الدین تون ہیت وگپ کرسا پارے کہ ساڑی آ حکومت نا معاشی پالیسی تا سوب آن بین الاقوامی مالیاتی ادارہ غاک پاکستان ءِ ترندی اٹ شون کرسا ملک آتا صف اٹی اوڑدہ کرینو ہرا اہم ءُ پیش رفت اسے۔
صدر مملکت پارے کہ پاک چین اقتصادی راہداری اسہ تاریخی ءُ ڈٹ اسے و اونا پوروی آن نہ صرف پاکستان اٹی بلکن مچ آ ڈیہہ ٹی شونہالی بریک۔ اوپارے کہ توانائی نا برجاء ڈٹ آتا پوروی آن ملک ءِ 2018 ء اسکان بجلی نا لوڈشیڈنگ آن نجات ملک۔ ڈاکٹر سید نامفضل سیف الدین پاکستان نا شون انا ستاءِ کرسا پارے کہ او پاکستان و اونا الس ءِ است و جان اٹ دوست تخک۔
اوصدر مملکت ممنون حسین نا کڑد انا ستاءِ کرسا پارے کہ او بے کچ مشکل وخت اٹی پاکستان نا سروکی ءِ کننگ ءِ۔ صدر مملکت ڈاکٹر سید نا مفضل سیف الدین و اونا ڈل انا اعزاز اٹی اِرغ ہم تس ہراٹی بنجائی وزیر پٹرولیم و قدرتی وسیلہ شاہد خاقان عباسی ، سینیٹ اٹی قائد ایوان ظفرالحق و بنجائی وزیر ڈٹ بندی و شون احسن اقبال آن بیدس بوہرہ برادری نا ڈل ہم شرکت کرے۔ داوخت آ ڈاکٹر سید نامفضل سیف الدین صدر مملکت ءِ ٹیکی اس ہم پیش کرے۔
