اسلام آباد(پاکستان نیوزپوائنٹ 16اگست 2016ء) اسپیکر قومی اسمبلی سردار ایاز صادق اولیکو ینگ پارلیمنٹرینز سارک کانفرنس نا شرکاء نا خیرمقدم ءِ کرسا ڈیہہ نا ملک آتیا زورشاغا کہ پرامن ہمسائیگی نا تصور آن بیدس امن و شون نا تغ پورو مننگ کپک، داڑکن ڈیہہ نا ملک آتے اسہ ایلو تون ایلمی ءِ مون آدننگ کن مون آ بروئی مریک ہراڑکن ڈیہہ نا ملک آتا نیام اٹ السی کہول رابطہ و جمہوری اقدار ءِ سوگو جوڑ کرسا ہدف آتے دوئی کننگ مریک، جمہوریت نا مطلب ہی ہندادے کہ اختلاف رائے ءِ مذاکرات نا کمک اٹ اتفاق رائے ٹی بدل کننگے۔
سے شنبے آ داڑے شون اکن امن و ایلی نا سرحال آ اولیکو سارک ینگ پارلیمنٹرینز کانفرنس نا افتتاحی دود آن تران کرسا اسپیکر قومی اسمبلی سردار ایاز صادق پارینے کہ پاکستان نا قومی اسمبلی نا 342نشست آتیان 70 آ ورناپارلیمنٹرینز گچین مسنو۔ اونیاڑی باسک پارلیمنٹ نا کارکڑد نا خاص وڑاٹ صفت ءِ کرے۔ اوسویلی ایشیائی ملک آتا تنظیم سارک نا ورنا پارلیمان نا باسک آتے ببوخیرٹ پارسا پارے کہ اینخو سال نومبر اٹی اسلام آباد اٹی سارک کانفرنس اڈ ہلیک۔
ڈیہہ نا ملک آتے مون تروک اسیجائی چیلنج آتون مون تننگ کن دا فورم آتا کمک اٹ ننے اواری اٹ ایسر ءِ پٹوئی مریک۔ جمہوریت نامطلب ہی دادے کہ اگہ اختلاف رائے خننگے تو مذاکرات نا کمک اٹ اتفاق رائے ودی کننگے۔ ننا ایسر نا چاری ویل آک صرف مذاکرات نا کمک اٹ ایسر مننگ کیرہ ہراڑآن ڈیہہ ٹی امن و شون و شونہالی بریک۔ ننا شون و شونہالی نا تغ ہمووخت آ پورو مریک ہراتم ڈیہہ ناملک آتا نیام اٹ پرامن ہمسائیگی نا تصور ساڑی مریک۔
اوپارے کہ زند انا ہر بشخ اٹی صں فی توازن ءِ برقرار تخنگ آ توجوہ تروئی مریک۔ اسیجائی سیکورٹی ، موسمیاتی بدلی تتون اوار ایلو ویل آتیا اواری اٹ لائحہ عمل اس مرتب کروئی مریک، سیاسی سرجزآتیٹی ڈیہہ نا ورناو سول سوسائٹی نا زیات آن زیات اوار مننگ ءِ باوری جوڑ کننگ آن ہم ڈیہہ نا آخبت آ مثبت زئم رونما مریک۔ اوپارے کہ ڈیہہ نا ملک آتا نیام اٹ السی کہول آ رابطہ غاتے مون آ درسا ہم امن ، شون و شونہالی نا کسر ءِ ہموار کننگ مریک۔
داکان مست باسک قومی اسمبلی ملک عزیز خان سارک ینگ پارلیمنٹرینز و شرفمند مہمان آتے ببوخیرٹ پارسا پارے کہ داتاریخی موقع اسے، اسپیکر سردار ایاز صادق ینگ پارلیمنٹرینز آتا دیوان نا تغ ءِ تعبیر تس۔ ڈیہہ نا ملک آتا ینگ پارلیمنٹرینز آتے اسہ ایلو تون ملنگ تون اوار اوار ڈیہہ نا گچینی ، شون و شونہالی کن اواری اٹ کاریم کننگ نا موقع ملک ہراڑآن سویلی ایشیانا آخبت آ مثبت زئم رونما مریک۔
یات سلے کہ اولیکو سارک ینگ پارلیمنٹرینز کانفرنس اٹی بھارت، اوغانستان ، بنگلہ دیش، بھوٹان ، مالدیپ ، سری لنکا، نیپال نا پارلیمنٹرینز و وڈل آک شریک ءُ۔ پاکستان نا کنڈآن قومی اسمبلی نا باسک ملک عزیز خان ءِ کم وئی ترین پارلیمنٹرین مننگ نا سوب کانفرنس نا کنوینر مقرر کننگانے۔ کانفرنس (اینو) چارشنبے آ اختتام پذیر مریک اوکان گڈ اسیجائی اعلامیہ اس ہم جاری کننگک۔
