اسلام آباد(پاکستان نیوزپوائنٹ 16اگست 2016ء) وزیراعظم نا خصوصی کمکار امور خارجہ طارق فاطمی پارینے کہ پاکستان بنگلہ دیش تون تینا تعلقداری تے بھاز اہمیت ایتک و جتا بشخ آتیٹی اوڑتون تعلقداری تیٹی ودکی خواہک۔ سے شنبے آ داڑے بنگلہ دیش نا پوسکنا ہائی کمشنر طارق احسان تون اوڑدہی نا وخت آ ہیت وگپ کرسا او پاکستان و بنگلہ دیش نا تعلقداری تیٹی ساڑی آ چینلج آتا ایسری نا گرج آ زورشاغا و پارے کہ ننے اپریل 1974ء نا سہ کڑدہ ہی معاہدہ نا جوزہ نا رداٹ مون آ بروئی مرے۔
بڑزکو کہولی سیاسی ڈل انا درشان آتا اہمیتءِ تالان کرسا او نومبر 2014ء ٹی کھٹمنڈو ٹی سارک سروک دیوان نا وخت آ ہڑتوم آ وزیراعظم آتا اوڑدہی نا حوالہ ءِ تس۔ اوپارے کہ دا اوڑدہی مفید مس و ہڑتوم آ راہشون تے ہڑتوم آ کنڈآتا تعلقداری تا ساڑی آ حالیت آتا جاچ ءِ ہلنگ و علاقائی و جہانی معاملہ غاتیا درشان خیال نا موقع ملا۔ طارق فاطمی پارے کہ بڑزکو کہولی رابطہ غاتے ہڑتوم آ کنڈآتا تعلقداری تے سوگو جوڑ کننگ نا کسر ءِ ہموار کیک۔ اوہڑتوم آ کنڈآتا تعلقداری تے پین مون آ دننگ کن ہائی کمشنر ءِ حکومت پاکستان نا پورو کمک نا باوری ترفے۔
