اسلام آباد(پاکستان نیوز پوائنٹ 01مارچ2017ء) وزیراعظم محمد نواز شریف پارینے کہ اقتصادی کمکار تنظیم نا باسک ملک آتے کن گچین کمکاری نا کمک اٹ مون نا کنڈآ پیش رفت نا وخت بسنے، پاکستان نا محل و وقوع گچین ءِ، ایکو ءِ واکدار اقتصادی بلاک اس جوڑ کننگ و شونداری نا کنڈآ پیش رفت کن اودے اسہ گچین ادارہ اس جوڑ کننگ نا اسیجائی وژن نا دوئی کن پاکستان تون بنداوی ڈھانچہ اس ساڑی ءِ، باسک ملک آتا نیام اٹ رابطہ غاتے استوار کننگ و واپاری کسرتیا چکارتخنگ خوائک ، نن البیرونی ، فارابی، سعدی، رومی و اقبال کون آ عظیم خلقت نا قابل فخر وارث اُن۔
اوداخیال آتا درشانی ءِ چارشنبے نا دے داڑے پاکستان نا میزبانی ٹی اقتصادی کمکار تنظیم نا 13می دیوان نا افتتاحی سیشن آن تران کرسا کرے۔ وزیراعظم محمد نواز شریف پارے کہ او داہیت آ باوری تخک کہ اقتصادی کمکار تنظیم نا وخت داسہ بسنے و دا گچین ءُ وخت اسے کہ مون نا کنڈپیش رفت کننگے، علاقائی شونہالی کن رابطہ غاتا تینا تغ ءِ حقیقت اٹی بدلیفنگ کن داڑآن زیات مناسب وخت مہالو وخت اس ہم بتنے۔
اقتصادی کمکار تنظیم نا سروک دیوان اٹی غٹ 10 باسک ملک آتا 8 مملکتی و حکومتی سروک آک ساڑی ءُ۔ داٹی پاکستان آن بیدس ایران، آذربائیجان ، ترکی، اوغانستان ، تاجکستان ، قزاخستان، ترکمانستان ، کرغزستان و ازبکستان اوار ءُ۔ وزیراعظم محمد نواز شریف ہرادے داکان مست اقتصادی کمکار تنظیم نا 13می دیوان اٹی چیئرمین گچین کننگا، پارے کہ پاکستان نا محل و وقوع گچین ءِ، ملک اٹی سیاسی سوگوی ءِ و اقتصادی کمکار تنظیم ءِ اسہ واکدار اقتصادی بلاک اس جوڑ کننگ وشونداری نا کنڈاپیش رفت کن دادے اسہ گچین ادارہ اس جوڑ کننگ نا اسیجائی وژن نا دوئی کن پاکستان تون بنداوی ڈھانچہ اس ساڑی ارے۔
وزیراعظم پارے کہ اقتصادی کمکار تنظیم نا 13می سروک دیوان ہندن ءُ وخت اسے ٹی مننگ ءِ ہراتم تنظیم نا ودیکی نا 25می سال دے ءِ۔ دا اقتصادی کمکار تنظیم نا بنداوی اصول و نظریات نا تجدید نا پرمسرت موقع ءِ۔ اوپارے کہ اقتصادی کمکار تنظیم نا ایجنڈا ہمیشہ الس آ مرتکز مسنے، داسروک کانفرنس اٹی نن باسک ملک آتا نیام اٹ رابطہ غاتے استوار کننگ و واپاری کسرتیا چکارتخنگ خوانہ تانکہ اقتصادی کمکار تنظیم ڈیہہ نا الس شون ہلنگ کے۔
وزیراعظم پارے کہ اقتصادی کمکار تنظیم نا ڈیہہ غیر اہم جغرافیائی علاقہ اس اف، داسہ بھلو علاقہ اسے ہرا دنیا نا آبادی نا شش می بشخ ءِ ، داڈیہہ ٹی اگہ بے کچ وارخواہی ساڑی ارے و دنیا نا آبادی ٹی 16درسد ایکو ملک آتا ءِ ولے دنیا نا واپار اٹی دانا بشخ محض 2 درسد ءِ۔ ہنداوڑ ایکو ملک آتا دنیا تون واپار اٹی بھلو معمولی ءُ بشخ اسے۔ وزیراعظم پارے کہ نن اسہ ایلو ٹی رابطہ غاتے مون آ درسا دا حساب وکتاب اٹی ودکی کننگ کینہ۔
اوپارے کہ داکانفرنس نا ”علاقائی شونہالی کن رابطہ غاتا مون آ دننگ“ نا سرحال ننا اسیجائی مستین و شونہالی آخبت کن ننا اسیجائی عزم انا عکاسی ءِ کیک۔ اوپارے کہ اقتصادی کمکار تنظیم ءِ علاقائی کمکاری نا اسہ مثال اس جوڑ کننگ مریک و ننا الس نا زند دانا کمک اٹ جوڑ مننگ کیک۔ دارداٹ دانا اہمیت پین ودک کہ ڈیہہ نا کیہی ملک آک رابطہ غاتے مون آ دننگ نا ڈٹ آتیٹی مست آن بھلو زرکاری اس کننگ ءُ۔
وزیراعظم پارے کہ ڈیہہ نا ملک آک سینٹرل ایشین ٹرانس یورایشین لینڈ برج نا کمک اٹ ترندی اٹ مون آ بننگ ءُ۔ صحرا و مش تے عبور کرسا تیل و گیس پیپ لینک مارکیٹ اسکان رسینگ انگ ءُ و ریل روڈ نیٹ ورکس رابطہ غاتے استوار کننگ نا ننا عزم انا عکاسی ءِ کیک۔ اوپارے کہ ننے گیشتر سیوت کن تینا انفرادی کوشست آتے اجتماعی عمل اٹی بدل کرسا پین مسخت دوئی کروئی مرے۔ وزیراعظم یخین ظاہر کرے کہ ای سی او نا وخت حقیقی وڑاٹ بسنے رسینگانے۔ اوپارے کہ ننے پبی وڑاٹ مون آ ہِننگ نا گرج ءِ و علاقائی شونہالی کن رابطہ غاتا مون آ دننگ نا تینا تغ ءِ عملی تعبیر تننگ کن داکان زیات گچین موقع مہالو وخت اس ہم بتنے۔
