اسلام آباد(پاکستان نیوز پوائنٹ 28فروری2016ء) صدر مملکت ممنون حسین و آذربائیجان نا صدر الہام علیوف ہڑتوم آ ملک آتا نیام اٹ واپار، تعلیم ، سائنس و ٹیکنالوجی و دفاع نا بشخ آتیٹی کمکاری ءِ ودفنگ آ امنا کرینو۔ اوڑدہی ٹی ہڑتوم آ راہشونک پاکستان نا ”نگوونوکاراباخ“ و آذربائیجان نا”کشمیر“ نا ویل آ مخ تفی ءِ برجاتخنگ نا پڑو کریر۔ آذربائیجان نا صدر الہام علیوف تینا ڈل اتون اوار اقتصادی کمکار نا تنظیم اٹی بشخ ہلنگ کن پاکستان آ سرمسنے، ہراک ایوان صدر اٹی صدر ممنون حسین تون اوڑدہی کریر۔
اوڑدہی ٹی ہڑتوم آ سروک آتا نیام اٹ جتائی ٹی مروک آ اوڑدہی آن پد ڈل انا کہول آ مذاکرات مس۔ آذربائیجان نا صدر الہام علیوف پارے کہ دنیا غا دا صفا کننگ نا گرج ءِ کہ اسلام امن نا دین اسے۔ صدر علیوف پارے کہ پاکستان و آذربائیجان ، ٹیکسٹائل ، کشاری ازباب و ادیب آتا بشخ آتیٹی اسیجائی ڈٹ آتیا کاریم کننگ کیرہ۔ آذربائیجان نا صدر پارے کہ دا سال اسلامی یکجہتی گوازی تا بناءِ کننگک۔
صدر ممنون حسین پارے کہ پاکستان و آذربائیجان ڈیہہ ٹی امن، شونداری و شونہالی کن کوشست آتے برجاتخرہ۔ صدر ممنون حسین تین پہ تینی واپار نا کچءِ ودفنگ آ زورشاغا۔ اوپارے کہ آذری زرکارآک پاکستان ناآزادانہ زرکاری و بھلامارکیٹ آن فائدہ ہرفر۔ آذربائیجان نا صدر پارے کہ او پاکستان ءِ تینا ارٹ میکو اُرا سمجھک و اونا ملک پاکستان تون چندی بشخ آتیٹی است خواہی تخک۔
اوپارے کہ پاکستان و آذربائیجان ڈیہہ نا شونہالی کن اواری اٹ کاریم کیرہ۔ صدر علیوف پارے کہ ہڑتوم آ ملک علاقائی و جہانی ویل آتیا اسہ وڑنا موقف تخرہ۔ آذربائیجان نا صدر اونا و اونا ڈل انا جم و جوش اٹ بخیر کننگ آ منت واری ءِ ادا کرسا پارے کہ اوناملک چندی بشخ آتیٹی پاکستان ناآزموندہ غاتیان فائدہ ہرفنگ اٹی است خواہی تخک۔ داکان مست ایوان صدر بننگ آ صدر ممنون حسین آذربائیجان نا صدر ءِ بخیر کرے۔ داوخت آ روایتی لویس اٹی ملبوس چناک آذربائیجان نا صدر ءِ گل دستہ اس پیش کریر۔ آذربائیجان نا ڈل اٹی وزیر خارجہ ایلمارمیماد محمدوو، سلاہکار خارجہ ناروز میمادوو، وزیر اقتصادیات شاہین مصطفیو، وزیر توانائی ناطق علیو و پاکستان اٹی سفیر علی فکرت اوگلوعلیزادہ اوار ئسر۔
