اسلام آباد(پاکستان نیوز پوائنٹ 01مارچ2017ء) وزیراعظم محمد نواز شریف ءِ اقتصادی کمکار تنظیم (ایکو) نا 13می سروک دیوان نا چیئرمین گچین کننگا۔ ایکو سروک دیوان چارشنبے نا دے اسلام آباد اٹی بناء کرے ہراٹی اقتصادی کمکار و علاقائی رابطہ کاری ٹی ودکی آ چکار کننگانے۔ دیوان اٹی اقتصادی کمکار تنظیم نا باسک ملک آذربائیجان ، قزاخستان ، کرغزستان ، ایران، تاجکستان ، ترکی، ترکمانستان و ازبکستان نا سروک مملکت و حکومت آن بیدس چین نا خصوصی نمائندہ غاک بشخ ہلکر۔
پاکستان اٹی اوغانستان نا سفیر سروکی دیوان اٹی تینا ملک انا نمائندگی ءِ کننگ ءِ۔ اقتصادی کمکار تنظیم 1985ء ٹی قائم کننگا۔ بنائی وڑاٹ ایران، پاکستان و ترکی دا تنظیم نا باسک ئسر ہرانا مسخت باسک ملک آتا نیام اٹ اقتصادی ، تکنیکی و دودوربیدہ ہی کمکاری ءِ مون آ دننگ نا ئس۔ دا تنظیم علاقائی کمکاری شونداری (آرسی ڈی ) نا تسلسل ءِ ہرا 1964ء آن 1979ء اسکان قائم سلیس۔ 1992ء ٹی ایکو ٹی 7 پوسکن آ باسک آتا ودکی کننگا ہراٹی اوغانستان ، آذربائیجان ، قزاخستان ، کرغزستان ، تاجکستان ، ترکمانستان و ازبکستان اوار ءُ۔
