کابل (پاکستان پوائنٹ نیوز۔25 جولائی۔2016) اوغانستان نا دے ٹکی صوبہ ننگرہار اٹی شدت پسند تنظیم داعش نا برخلاف کارروائی، 60عسکریت پسند تپاخت و چندیک ٹھپی مسر، خوست اٹی بارودی سرنگ نا دھماکہ ٹی نیاڑی اسے تون اوار مسہ بندغ تپاخت کریر، جوزجان اٹی عسکریت پسند آک نجی ٹیلی کام کمپنی این ٹی ایم نا چار برمتہ مروک کارندہ غاتے یلہ کریر۔ اوغان میڈیا نارداٹ کابل اٹی وزارت داخلہ دوشنبے آ تینا اسہ بیان اسے ٹی پارینے کہ ننگر ہار نا ضلع آچین و کوٹ اٹی شدت پسند تنظیم داعش نا برخلاف کارروائی کننگا۔
داوخت آ داعش تون وابستہ 60عسکریت پسند تپاخت و چندیک ٹھپی مسر ۔ داعلاقہ ٹی اوغان فورسز آتا کنڈآن آپریشن شاہین جاری ءِ ہراٹی داوخت اسکان سد آ عسکریت پسند آتا تپاخت نا داوا کننگانے۔ دے ٹکی صوبہ خوست اٹی بارودی سرنگ نا دھماکہ ٹی اسہ نیاڑی اسے تون اوار مسہ بندغ تپاخت کریر۔ ضلعی پولیس چیف نا رداٹ ضلع علی شیر اٹی اسہ گاڈی اسینا خرک بارودی سرنگ نا زوردار دھماکہ اس مس ہرانا نتیجہ ٹی اسہ نیاڑی اس، اونا مسڑ و اسہ پین بندغ اس تپاخت کرے۔
پولیس نا رداٹ بارودی سرنگ سیکورٹی فورسز آتا گاڈی ءِ نشانہ جوڑ کننگ کن تخنگاسس۔ ہنداصوبہ نا علاقہ سپیرہ ٹی حقانی نیٹ ورک تون وابستہ اسہ کمانڈر اسے تپاخت کننگ نا داواکننگانے واہم دا بابت پین سرجم احوال تننگ تو۔ قطبی صوبہ جوزجان اٹی عسکریت پسند آک نجی ٹیلی کام کمپنی این ٹی ایم نا چار برمتہ مروک کارندہ غاتے یلہ کریر۔ داکارندہ غاتے منہ دے مست شدت پسند آک برمتہ کریسر۔
اوغان کمامدارآتارداٹ داکارندہ غاتا رہائی سرکڑدہ غاتا کوشست آن ممکن مسنے۔ اوکان بیدس داعش کابل اٹی ہزارہ برادری نا مچی کروک آتیا مروک آ جلہو نا عکس راجی میل جول نا ویب سائٹ ٹوئٹر آ جاری کرینو۔ اوغان کمامدارآتارداٹ دا فوٹیج تنظیم نا وابستہ گان آتا کنڈآن جاری مسنے ہراٹی اِرا خودکش جلہو گیر آک بشخ ہلکر۔ داکارروائی ٹی 80بندغ تپاخت کریسر۔
