اقوام متحدہ(پاکستان پوائنٹ نیوز 21 مئی 2018ء) پاکستان جہانی جھیڑہ غاتا ایسری کن اقوام متحدہ نا امن مینڈیٹ اٹی بدلی تا خواست کرینے۔ داخواست ءِ اقوام متحدہ ٹی پاکستان نا آخبتی مندوب ڈاکٹر ملیحہ لودھی جہانی ادارہ نا ہیڈکوارٹرنیویارک اٹی اسہ دیوان اسے آن تران اٹی کرے۔ ڈاکٹر ملیحہ لودھی دیوان اٹی اقوام متحدہ نا قیام امن مشن آتے کن فوجی و پولیس کارندہ غاتا دستہ فراوان کروک آ ملک آتا رڑنا چیئرپرسن نا حیثیت اٹ شرکت کرے۔
دیوان اٹی بشخ ہلوک آ ملک آتا مندوبین آک اقوام متحدہ نا امن مشن نا گام گیج آتے پین سوگو و رکھ جوڑ کننگ کن پبی کمک و مخ تفی فراوان کننگ نا عزم انا اعادہ کرے۔ پاکستانی مندوب پارے کہ پیس کیپرز نا مینڈیٹ اٹی بدلی اتسا جہانی جھیڑہ غاتا سیاسی ایسری ءِ پٹنگ آ زیات چکار کننگے ولے داعمل اٹ بدلینگوک سیاسی وو ڈغاری حق ءِ تینا کننگ نا وخت آ قیام امن نا بنداوی اصول آتے پورو وڑاٹ برقرار تخنگے۔ داوخت آ ڈی پی کے او نا انڈر سیکرٹری جنرل جین پیری لیکروئکس و انڈر سیکرٹری جنرل آف دی ڈیپارٹمنٹ آف فیلڈ سپورٹ اٹل کھارے ئسک ہم تران کریر۔
