اقوام متحدہ(پاکستان نیوز پوائنٹ 20ستمبر 2016ء) وزیراعظم نا سلاہکار امور خارجہ سرتاج عزیز فلسطین نا الس تون یکجہتی نا درشانی ءِ کرسا پارینے کہ اسرائیل فلسطینی تا بنداوی حق ءِ غصب کرینے، اقوام متحدہ نا جنرل اسمبلی نا دیوان نا وخت آ او آئی سی کمیٹی فلسطین نا سالانہ دیوان آن تران کرسا سلاہکار خارجہ پارے کہ اسرائیل نا کنڈآن یہودی بستی تیٹی غیر کانودی ودیکی جاری ءِ و کودک فلسطینی تے منظم وڑاٹ شہید کننگ انگ ءِ و لکھ آتا آبادی نا شار غزہ نا محاصرہ کیہی سال آن جاری ءِ۔
اوپارے کہ بین الاقوامی برادری ءِ کودک فلسطینی تے تون یکجہتی نا درشانی ءِ کروئی مرے و اوفتا ویل آ پبی توجوہ تروئی مرے۔ اوپارے کہ فلسطینی تا 1967ء آن مست انا جغرافیائی دنگ انا رداٹ تینا آجو ریاست بایدے مرے ہرانا دارالحکومت القدس مرے۔ سرتاج عزیز او آئی سی نا سیکرٹری جنرل نا کماشی ٹی دیوان اٹی پاکستانی ڈل انا سروکی ءِ کرسا فلسطین نا ویل آ پبی وڑاٹ تالان کرے۔
دیوان اٹی فلسطین، ملائیشیا وسینیگال نا وزیر خارجہ غاک ہم شریک مسر۔ داکان بیدس مصر، اردن و ترکی نا نمائندہ غاک ہم شرکت کریر۔ دیوان اٹی بین الاقوامی برادری آ زورشاغنگاکہ او اسرائیل آ بین الاقوامی کانود نا رداٹ تینا وعدہ غاتیا عملدرآمد کرفنگ کن زورشاغے و دے ٹکی نیامی ٹی سوگو امن و سوگوی کن تینا زمہ واری تے پور و کے۔
