نیویارک۔ 20ستمبر (اے پی پی) وزیراعظم محمد نواز شریف نا (اینو) چارشنبے آ اقوام متحدہ نا جنرل اسمبلی آن تران آن مست اسلامی کمکار تنظیم (او آئی سی ) نا کشمیر نا بارواٹی رابطہ رڑنا باسک آک بہادر کشمیری الس تون یکجہتی نا درشانی ءِ کرینو و بھارت نا کوزہ ٹی متنازعہ ریاست اٹی بھارتی بیدادی نا چٹفنگ نا خواست کرینو۔ اقوام متحدہ نا جنرل اسمبلی نا 71می دیوان نا وخت آ مروک آ دیوان اٹی اوپاکستان و بھارت نا نیام اٹ کیہی دہائی متکنا تنازعہ نا پرامن ایسری نا گرج آ زورشاغانو۔
رابطہ رڑ نا باسک آک بین الاقوامی کہول آ کشمیری الس نا ویل انا ایسری کن توار چست کننگ نا عزم انا ہم اعادہ ءِ کریر۔ او آئی سی نا رابطہ رڑ نا دیوان سیکرٹری جنرل ایادامین مدنی نا کماشی ٹی مس ہراٹی خارجہ امور نا بارواٹی وزیراعظم نا سلاہکار سرتاج عزیز ، ترکی و آذربائیجان نا وزیر خارجہ ، نائیجیریا و سعودی عرب نا سینئر نمائندہ و آزاد جموں و کشمیر نا صدر سردار مسعود احمد خان ہم شرکت کریر۔
او آئی سی نا سیکرٹری جنرل ایادامین بھارتی مقبوضہ جموں و کشمیر اٹی سنگین حالیت آتیا تشویش نا درشانی ءِ کرسا بھارتی بیدادی و بربریت ءِ دمدستی وڑاٹ توننگ نا خواست کریر و بھارت نا حکومت آ زورشاغاکہ او اقوام متحدہ نا قرارداد و کشمیری الس نا است خواہی نا رداٹ ویل انا پرامن ایسر اس کشر اوپارے کہ کوزہ گر بھارتی فورسز آک کشمیری تے بینائی آن محروم کننگ کیرہ واہم او کشمیری تے حق خودارادیت آن محروم کننگ کپسہ۔
داوخت آ خارجہ امور نا بارواٹی وزیراعظم نا سلاہکار سرتاج عزیز پارے کہ کشمیری ورنا کسرشون برہان وانی نا بہیمانہ شہیدی آن پد آن داوخت اسکان بھارتی کوزہ گر فورسز آتا دوتے اٹ 100 آن زیات کشمیری شہید و 8 ہزار کشمیری شاری ٹھپی مسنو۔ بھارتی فورسز آتا پیلٹ گن آتیان 150 آن زیات بندغ آخبتی وڑاٹ بینائی آن محروم مسنو وخت اس کہ 350 بندغ نا بینائی ءِ سخت نسخان رسینگانے۔
خارجہ امور بارے وزیراعظم نا سلاہکار پارے کہ دا بیدادی تیان کشمیری الس نا جوزہ آجوئی و حق خودارادیت نا جہد ءِ توننگ مفک۔ خارجہ امور بارواٹی وزیراعظم نا سلاہکار نا درخواست آ رابطہ رڑ نا باسک آک کشمیری شہید آتے کن فاتحہ خوانی کریر۔ سلاہکار برائے خارجی امور سرتاج عزیز داہیت آ افسوز نا درشانی ءِ کرے کہ بھارت پاکستان نا جموں و کشمیر نا تنازعہ نا ایسری کن بامقصد مذاکرات نا پیش کش نا ہچ ءُ مثبت ورندی اس تتو۔
آذربائیجان و ترکی نا وزیر خارجہ غاک ہم بھارتی مقبوضہ و جموں و کشمیر اٹی بگڑینگوک آ حالیت آ بھاز گڑتی نا درشانی ءِ کریر و اوفک بھارت نا کنڈآن بے گناہ کشمیری تا انسانی حق انا خلاف ورزی تیا ہم بھاز گڑتی نا درشانی ءِ کریر۔ ترکی نا وزیر خارجہ کشمیر نا تنازعہ ءِ دمدستی ایسری کننگ نا گرج آ زورشاغار۔ اوپارے کہ ڈیہہ ٹی امن و شون اکن کشمیر نا ویل انا ایسری المی ءِ۔
آذربائیجان نا وزیر خارجہ پارے کہ اوآئی سی ءِ مقبوضہ کشمیر اٹی بھارت نا کنڈآن کشمیری تا انسانی حق انا خلاف ورزی تے تالان کروئی مرے۔ دیوان نا وخت آ کشمیری تا حقی نمائندہ غاک شریک مروک آتے بھارت نا پدریسہ جاری بربریت ، وحشیانہ بیدادی و خاص وڑاٹ 8جولائی 2016 ء آ مظفر وانی نا شہیدی آن گڈ مروک آ بیدادی آن ہم معلومدار کریر۔ آزاد جموں و کشمیر نا صدر مسعود خان ہم بھارت نا کنڈآن مقبوضہ کشمیر اٹی انسانی حق انا خلاف ورزی و کشمیری تیا کروک آ بیدادی نا بارواٹی سرجمی وڑاٹ پارے۔ دیوان نا کارروائی و سفارشات آتے ہم منظور کننگا ہراکہ کارروائی کن او آئی سی ملک آتا وزیر جارجہ غاتا کونسل ءِ مناسب گام گیج کننگ کن گدریفنگرہ۔
