نیویارک۔ 19ستمبر (اے پی پی) وزیراعظم محمد نواز شریف اقوام متحدہ نا جنرل اسمبلی نا 71می دیوان اٹی شرکت کن بے کچ اہم دورہ غا نیویارک آ سرمس۔ وزیراعظم ہاؤس آن جاری بیان نا رداٹ مسٹ میکو وار وزیراعظم نا عہدہ ءِ سنبھالنگ آن پد او جنرل اسمبلی آن تینا چارمیکو تران ءِ کیک ۔ نیو یارک اٹی تینا اڈ کننگ نا وخت وزیراعظم 21ستمبر 2016ء آ اقوام متحدہ نا جنرل اسمبلی آن تینا تران اٹی کیہی اہم بین الاقوامی معاملہ غاتیا پاکستان نا موقف ءِ پیش کیک ۔
وزیراعظم تدینگوک آ سال آمبار داوار ہم کشمیر نا ویل آ خصوصی توجوہ ءِ تخک۔ او ورنا کشمیری کسرشون برہان الدین وانی نا ماورائے عدالت خون آن گڈ آن مقبوضہ کشمیر اٹی بنداوی انسانی حق انا سنگین خلاف ورزی تیا جہانی کسرشون آتا توجوہ ءِ مبذول کرفک۔ بیان نا رداٹ وزیراعظم مقبوضہ کشمیر نا دیرینہ ویل انا زوت ایسری نا گرج آ ہم زورشاغک۔ وزیراعظم بین الاقوامی برادری و اقوام متحدہ آن خواست کیک کہ جموں و کشمیر نا الس نا حق خودارادیت کن کروک آ وعدہ غاتا پاسداری ءِ کننگے ہرانا وعدہ اقوام متحدہ نا سلامتی کونسل نا قرارداد آتیٹی کننگاسس۔
وزیراعظم تینا تران اٹی علاقائی و بین الاقوامی امن و سوگوی کن پاکستانی کوشست آتے ہم مون آ تخک۔ دورہ نیویارک نا وخت آ وزیراعظم محمد نواز شریف بین الاقوامی کسرشون آتے رکھ، سوگو و معاشی وڑاٹ شون ہلسا پاکستان نا بابت آن ہم معلومدار کیک۔ اوڑتون اوار اوار وزیراعظم قومی، علاقائی و بین الاقوامی امن و سلامتی ، انتہاء پسندی و دہشت گردی نا خاتمہ کن سلہہ بند فوج ، کانود نافذ کروک آ ادارہ ، پولیس کارندہ غاتون اوار الس نا لازوال قربانی تے ہم مون آ تخک۔
اقوام متحدہ نا جنرل اسمبلی ٹی شرکت تون اوار اوار وزیراعظم تینا برطانوی ہم منصب، ترکی نا صدر، ایرانی صدر، جاپان نا وزیراعظم ، نیوزی لینڈ نا وزیراعظم و اقوام متحدہ نا سیکرٹری جنرل بان کی مون و امریکی وزیر خارجہ جان کیری تون ہم اوڑدہی کیک۔ داوخت آ وزیراعظم سعودی عرب نا ولی عہد نائب وزیراعظم نیپال و رومانیہ نا وزیراعظم آتون اوار کیہی جہانی کسرشون آتون اوڑدہی کیک ۔
وزیراعظم چین پاکستان اقتصادی راہداری ڈٹ ءِ حقیقت نا روپ تننگ نا بابت پاکستان و چین نا سفارتی کوشست آتا بارواٹی ہم جہانی کسرشون آتے آگاہی فراوان کیک۔ وزیراعظم محمد نواز شریف تینا جنرل اسمبلی نا تران نا وخت آ پناہ گزین آتا جہانی ویل آ پاکستانی موقف نا وضاحت ءِ ہم کیک اوڑآن بیدس وزیراعظم یو ایس پاکستان بزنس کونسل نا کنڈآن دود آن ہم تران کیک۔
