واشنگٹن (پاکستان نیوز پوائنٹ 07ستمبر 2016ء) امریکہ پاکستان نا کنڈآن پاک اوغان سیمی علاقہ غاتیٹی دہشت گرد آتا برخلاف کروک آ کارروائی تیا است جمی نا درشانی ءِ کرسا اودے است بڈ گواندانے۔ امریکی محکمہ خارجہ ٹی اسہ بریفنگ اسے نا وخت آ محکمہ خارجہ نا ترجمان مارک ٹونر اسہ سوج اسے نا ورندی ءِ ترسا پارے کہ پاکستانی انتظامیہ دہشت گرد آتا پدرند ءِ خلسا اوفتے چٹفنگ نا عزم انا تائید کرینے و پاکستان نا دا کارروائی تیان دہشت گرد آتا حوصلہ غاک پست مریرہ و ننے اومیت ءِ کہ کارروائیک برجاء سلرہ۔
مارک ٹونر پارے کہ اوباما انتظامیہ پاکستان نا کنڈآن شدت پسند آتا برخلاف ساڑی آ گام گیج آتیان است جم ءِ و دارداٹ پاکستان تون کمکاری ءِ برجاء تخک تانکہ دہشت گرد رڑآتیا دباؤ ءِ پین ودفنگے۔ مارک ٹونر جان کیری نا دورہ بنگلہ دیش و بھارت اٹی تروک آ بیان آتا بارواٹی اسہ سوج اسے نا ورندی ءِ ترسا پارے کہ امریکہ نا پاکستان تون صاف چاگڑد اٹی ہیت وگپ مسنے ہراٹی دہشت گرد رڑتا برخلاف گام گیج آتے پین ودفنگ نا گرج آ زور شاغنگانے خاص وڑاٹ ہموفتا برخلاف ہرا پاکستانی گل زمین ءِ تینا ہنداکارروائی تے کن کاریم اٹ اتیرہ۔
اواسہ سوج اسے نا ورندی ءِ ترسا پارے کہ امریکہ پاکستان تون غٹ دہشت گرد رڑتا برخلاف کارروائی نا خواست کرسا کرینے و دارداٹ بھاز گچینی نظر بننگ ءِ واہم پین گرج ءِ۔ مارک ٹونر پارے کہ امریکہ دا ہیت انا خوائش مند ءِ کہ پاکستان و بھارت نا نیام اٹ دہشت گردی نا برخلاف کمکاری و دابارواٹی انٹیلی جنس رپورٹس آتا تبادلہ غا اتفاق ءِ مون آ دننگے۔
