نئی دہلی(پاکستان نیوز پوائنٹ 31اگست 2016ء) امریکی وزیر خارجہ جان کیری بھارتی بیوروکریسی ءِ شون نا کسر آ اڑاند ودی کننگ نا ماہر گوندسا پارینے کہ بھارت تینا اقتصادی شون نا رفتار دا دروشم اٹ برقرار تخنگ کیک ہراتم اونا بیوروکریسی تینا دا کڑد ءِ ہلے۔ دورہ بھارت نا وخت آ اسہ انجینئرنگ کالج اسے ٹی تران کرسا اوپارے کہ سرخ فیتہ و عدم شفافیت ہندی اٹر اپرینورز و درملکی زرکارآتے کن بھلو اڑاند اسے۔
اوپارے کہ بھارت معیشت نا شون نارفتار ءِ برقرار تخنگ نا بارواٹی شکوک و شہبات ساڑی ءِ۔ بھارت اٹی بزنس کن چاگڑد ءِ گچین جوڑ کننگ المی ءِ۔ ہراٹی شفافیت و غٹ اکن بریبر وارخواہی مرے و ہرا زرکارآتے تینا کنڈا راغب کے۔ اوڑکن المی ءِ کہ کانود معقول مرے و بیوروکریسی فیصلہ سازی ٹی اسہ شریدار نا کڑد اس ادا کے نہ کہ اڑاند ودی کننگ اٹی ماہر نا ۔
بھارتی وزیراعظم نریندر مودی ملک آن بدعنوانی نا چٹفنگ کن کیہی واروعدہ کرینے ولے جہانی بینک نا اسہ رپورٹ اسے ٹی بزنس کن سازگار چاگڑد نا بابت مچ آ دنیا نا ملک آتیٹی بھارت داساہم 130 می نمبر آٹی ءِ۔ درملکی زرکارآتا پاننگءِ کہ بدعنوانی ، بیوروکریسی نا عدم کمکاری آ مبنی رویہ و ہیبدار کانود نا نتیجہ ٹی اودے تنازعہ نا دروشم اٹی سریس وخت اکن عدالتی کارروائی تا مون تروئی تمک۔
