واشنگٹن(پاکستان نیوزپوائنٹ20اکتوبر2017ء) امریکی سیکرٹری خارجہ ریکس ٹلر سن ہندا تُو اٹی پاکستان نا دورہ ءِ کیک ، دادورہ ٹی او پاکستان و امریکہ نا نیام اٹ انسداد دہشت گردی نا بشخ اٹی اسیجائی کوشست و ہڑتوم آ کنڈآتا اقتصادی تعلقداری تے ودفنگ نا بابت معاملہ غاتیا خیال آتا درشانی ءِ کیک۔ امریکی محکمہ خارجہ نا زالبول ترجمان ہیتھر نوورٹ تدوک آ دے پریس بریفنگ اٹی پارے کہ امریکی سیکرٹری خارجہ نا ایشیاء نا دااولیکو دورہ ءِ۔
پاکستان آن بیدس او بھارت، سعودی عرب ، قطر و جنیوا غاہم کاہک۔ اوپارے کہ پاکستان نا دورہ ٹی او پاکستانی کمامدارآتون ہڑتوم آ کنڈآتا کمکاری ، سویلی ایشیاکن امریکی حکمت عملی ٹی پاکستان نا اہم کڑد وہڑتوم آ ملک آتا نیام اٹ اقتصادی تعلقداری تے ودفنگ نا بابت معاملہ غاتیا خیال آتا درشانی ءِ کیک۔ اوپارے کہ پاکستان نا دورہ ٹی سیکرٹری خارجہ نا پاکستانی وزیراعظم وزیر خارجہ و سینئر فوجی عہدیدار آتون اوڑدہی نا گمان ءِ۔
او دہشت گردی نا برخلاف مہم اٹی اسیجائی گام گیج و دادہشت گرد رڑ تا برخلاف اسیجائی گام گیج آتیا خیال آتا درشانی ءِ کیک ہرانا سوب علاقائی امن و سلامتی ءِ خلیس ءِ۔ داکان بیدس اوغانستان اٹی امن و سوگوی نا اڈتننگ کن پاکستان نا کڑد انا بابت معاملہ غاتیا ہم سجفنگک۔ داکان مست پاکستانی وزیر خارجہ خواجہ محمد آصف واشنگٹن نا دورہ ءِ کرینے۔ کنٹرول لین آ سم کاری نا بابت سوج آ امریکی محکمہ خارجہ نا ترجمان پارے کہ امریکہ دامعاملہ غاتاایسری نا بارواٹی سنجیدہ ءِ۔ پاکستان نا دور ہ غان پد سیکرٹری خارجہ ٹلر سن نئی دہلی آ کاہک، اونا دورہ 20 اکتوبر آن بناء کیک و اولیکو مرحلہ ٹی او سعودی عرب آ کاہک۔