کابل (پاکستان نیوز پوائنٹ 19اگست 2016ء) اوغانستان نا نیامی صوبہ غور بارودی سرنگ نا دھماکہ ٹی مسہ فوجی کارندہ تپاخت و 5ٹھپی مسر، کنڑ اٹی اوغانستان نا آجوئی دے نا دود آ راکٹ جلہو اٹی اِرا شاری تپاخت و سیکورٹی کارندہ غاتون اوار 49 بندغ ٹھپی مسر ، امریکہ اوغانستان ءِ 600 ملین ڈالر مالیت نا سلہہ فراوان کننگ نا پڑو کرینے۔ اوغان ایئر فورس نا 300 کارندہ بھارت تون اوار کیہی ملک آتیٹی فوجی تربیت دوئی کننگ ءُ۔
اوغان میڈیا نا رداٹ سیکورٹی کارندہ غاک پارینو کہ تدوک آ دے ونیامی صوبہ غور انا علاقہ پاسا بند اٹی فوج انا گاڈی روڈ آ تخوک بارودی سرنگ تون ڈوک لگا۔ داواقعہ ٹی مسہ فوجی کارندہ تپاخت و 5ٹھپی مسر۔ کمامدارآتا رداٹ دا علاقہ غا منہ سال مست طالبانک کوزہ کریسر و ساڑی ہی ٹی اوغان فورسز آک علاقہ غا دُوارہ کنٹرول دوئی کریر۔ دے ٹکی صوبہ کنڑ اٹی اوغانستان نا آجوئی دے نا دود آ راکٹ جلہو اٹی اِرا شاری تپاخت و سیکورٹی کارندہ غاتون اوار 49 بندغ ٹھپی مسر۔
کمامدارآتارداٹ تدوک آ دے اسد آباد اٹی آجوئی دے نا بابت آن دود برجاء ئس کہ داوخت آ راکٹ جلہو مس۔ داوخت اسکان ہچ ءُ رڑیا تنظیم اس دا جلہو نا زمہ واری ءِ امنا کتنے۔ امریکہ اوغانستان ءِ 600 ملین ڈالر مالیت نا سلہہ فراوان کننگ نا پڑو کرینے۔ امریکی ڈیفنس سیکورٹی ایجنسی نا کنڈآن جاری سرجم احوال آتارداٹ محکمہ خارجہ دہشت گردی نا چٹفنگ و امن و ایمنی ءِ باوری جوڑ کننگ نا کوشست نا چرجوئی ٹی اوغانستان کن 600 ملین ڈالر مالیت نا سلہہ و فوجی و تکنیکی امداد نا منظوری تسنے۔
داکان مست اوغانستان نا کنڈآن جتا وڑنا سلہہ نا فراوانی نا درخواست تننگاسس۔ داکان بیدس اوغانستان نا وزارت دفاع تصدیق کرینے کہ اوغان ایئر فورس نا 300 کارندہ بھارت تون اوار کیہی ملک آتیٹی فوجی تربیت دوئی کننگ ءُ۔ وزارت دفاع نا ترجمان کابل اٹی جاری بیان اٹی پارینے کہ ملک اٹی دہشت گردی نا چٹفنگ کن اوغان ایئر فورس تینا کڑد ءِ ادا کننگ ءِ و دا چرجوئی ٹی اوغان ایئر فورس نا 300 کارند بھارت تون اوار کیہی ملک آتیٹی فوجی تربیت دوئی کننگ ءُ۔ بیان اٹی پاننگانے کہ ساڑی آ وخت اٹی اوغان ایئر فورس کن جتا وڑنا ہوائی جہاز و ہیلی کیپٹر دوئی کننگا۔
