دوشنبے(پاکستان نیوزپوائنٹ 5جولائی2017ء) مزن وزیر محمد نواز شریف صدر امام علی رحمانوف ءِ دعوت ءِ سرءَ چارشمبے روچءَ دوشنبے ءَ سربوتگ، تاجکستان ءِ مزن وزیر قاہررسول زادہ ءَ کابینہ ارکان ءِ ھمرائیءَ دوشنبے میاں اوستمانی بالی پڑ ءِ سرءَ آئیءَ را وش اَتک کتگ، مزن وزیر ءِ دری کارانی صلہ کار سرتاج عزیز، بنجاھی وزیر خواجہ محمد آصف، خرم دستگیر ھم مزن وزیرءِ ھمراھ اَنت۔
مزن وزیر ” کاسا1000“ ءِ باسکیں ملک اوگانستان، کرغزستان، پاکستان ء ُ تاجکستان ءِ چار جہتی سروک اجلاسءَ ھم ھوار بنت۔ اے منصوبہ ءِ مول ء ُ مراد توانائی راہداری ءِ جوڈ کنگ ء ُ تاجکستان ، اوگانستان ء ُپاکستان ءِ درنیام ءَ زمینی نزیکی جوڈ کنگ اِنت۔ اے پاکستان ء ُ اوگانستان ءَ را تاجکستان ء ُ اوزبکستان ءَ پیداک بوھوکیں بجلی ھم پھجارینت ایت۔
ترء ُتاب ءِ موھ ءَ یکے دومی ءِ دلچسپی ء ُ دمگی سرھالانی سرءَ ھیال ء ُ لیکہ ءِ درشانی کتگ پاکستان ، اوگانستان ء ُ تاجکستان ءِ درنیامءَ سہ جہتی سروکی اجلاس ھم کنگءِ گپ بوتگ۔ دوھیں ملک آنی رہنما بیپاری ء ُ زرکاری ، توانائی کمک ء ُ دمگی نزیکی ءَ ھوار دونیمگی سیادی ء ُ اقتصادی کمک ءِ سرءَ ھیال ء ُ لیکہ ءِ درشانی ءَ کنت۔ آ پاکستان ءِ امنء ُ ایمنیں ھمسائیگی ءِ پالیسی ءِ سرءَ ھاسیں دلگوشی کنگءَ اِنت ء ُ وت مہ وتی دمگی کارانی سرءَ گپء ُ تران کنت۔
دوھیں نیمگءِ ترء ُ تاب ءِ وھدءَ بازیں پڑآنی تہا ایم اویوزء ُ منء ُ گرءِ سرءَ ھم دستخط کنت۔ یات کنگ بہ بیت کہ پاکستان ء ُ تاجکستان ءِ درنیام ءَ نزیکیں ء ُ کمک ءِ سرءَ جوڈ بوتگیں سیادی اَست کہ یک وڑیں راج دپتر، دودء ُ ربیدگ ء ُ یک وڑیں عقیدہ اَنت۔ دوھیں ملک آنی خطہ ءِ تہا امنء ُ ایمنی ء ُ مھکمی ء ُ دیمروئی ءِ ھاترءَ یک وڑیں ھیال ء ُ لیکہ دار اَنت وھدے کہ دوھیں ملک آنی ھاسیں دمگی ء ُ میاں اوستمانی امورء ِ سرءَ ھم یک وڑیں مئوقف اِنت۔
پاکستان لھتیں ھما ملک آنی تہا چہ یک اِت کہ آھاں تاجکستان ءِ آجوئی ءَ را من اِتگ ء ُ سفارتی سیادی جوڈ کتگ ء ُ دوشنبے ءَ وتی ریذیڈنٹ مشن پچ کتگ۔ مزن وزیرءِ تاجکستان ءِ ترء ُ تاب ھمساھگ ء ُ دمگی ملک آنی گوما پاکستان ءِ ترندء ُ مھکمیں سیادی ء ُ دمگی نزیکی ءِ گیش کنگءِ ھاترءَ آئیء ِ وژن ءِ عکس کشیءَ کنت۔ ترء ُ تابءِ وھدءَ ” دمگی یکوئی ءِ ھاترءَ تزویراتی شریداری ءِ نیمگءَ شاہ دگ“ ءِ سرھال ءَ یک یکجائی اعلامیہ ءِ سرءَ ھم دستخط کنگ بیت۔
