بغداد(پاکستان نیوز پوائنٹ 10اپریل2017ء) عراق نا اہم مذہبی راہشون مقتدیٰ الصدر شام انا صدر بشارالاسد آن خواست کرینے کہ او اقتدار آن جتا مرے تانکہ ملکی تنکی نا سیاسی ایسری اس پٹنگ اٹی کمک رسینگے۔ تدوک آ دے اسہ بیان اسے ٹی اونا پاننگ ئس کہ دا بشارالاسد کن مناسب مریک کہ او ملک ءِ جنگ و دہشت گرد آتا پلویڑ آن بچفنگ اٹی کمک کن اقتدار ءِ ہلے۔ مقتدیٰ الصدر نا دا بیان اسہ ہندن ءُ وخت اسے ٹی مون آ بسنے ہراتم تدوک آ ہفتہ شام انا اسہ خلق اسے آ مروک آ کیمیائی جلہو نا ردعمل اٹی امریکہ اسہ شامی فضائی اڈہ اسے آ کروز میزائل خساسس۔
او چندی واقعہ غاتیا شام اٹی عراقی ملیشیا نا ساڑی نا مخالفت ءِ ہم کرینے و تینا تازہ بیان اٹی اونا پاننگ ئس کہ ہموڑے جنگ اٹی شریک غٹ کڑدہ غاک تینا فورس آتے شام آن کشر تانکہ شام انا الس ءِ تینا معاملہ غاتیا اختیار دوئی مننگ کے ایلو دروشم اٹی کپی تیٹی بدل مریک و اونا فائدہ بیرہ کوزہ گر و دہشت گرد آتے مریک۔ اونا پاننگ ئس کہ بشارالاسد ملک انا مقبول رڑ تا حوالہ کے ہرا دہشت گردی نا برخلاف سلنگ کیر۔
