واشنگٹن(پاکستان نیوز پوائنٹ 15مارچ2017ء) امریکہ ٹی پاکستان نا پوسکن آ سفیر اعزاز احمد چوہدری پارینے کہ پاکستان و امریکہ گدرینگوک آ7 عشرہ غاتیان شریدار مسنو و کثیر الجہتی تعلقداری تیان ہڑتوم آملک آتے فائدہ رسینگانے، اوغانستان اٹی تینا گام تے تخنگ آن مست پاکستان و امریکہ ءِ داعش ءِ بھس کننگ کن اواری اٹ کاریم کننگ نا گرج ءِ، اومیت ءِ کہ ڈونلڈ ٹرمپ نا پوسکن آ انتظامیہ پاکستان تون مثبت تعلقداری و کمکاری ءِ برجاتخک۔
دہشت گردی نا برخلاف جنگ اٹی پاکستان ہر ملک آن زیات قربانی تسنے، پاکستان سوگو، پرامن و شونہال اوغانستان اس خوائک۔ داہیت ءِ او واشنگٹن اٹی ”اے پی پی“ تون خصوصی ہیت وگپ کرسا پارے۔ اعزاز احمد چوہدری پارے کہ اونا کوشست مریک کہ ہڑتوم آ ملک آتا نیام اٹ تین پہ تینی است خواہی و ہڑتوم آ کنڈآتامفاد آ مبنی تعلقداری تے پین مون آ دننگے۔ ہڑتوم آ ملک آتا نیام اٹ گدرینگوک آ 7 عشرہ آن تعلقداریک اریر۔
اعزاز چوہدری پارے کہ صدر ڈونلڈ ٹرمپ و وزیراعظم محمد نواز شریف نا سوگو واپاری پس منظر مسنے و دارداٹ ہڑتوم آ ملک آک دا لیڈرتا آزموندہ غاتیان پاک امریکہ ہڑتوم آکنڈآتا اقتصادی تعلقداری تے پین مون آ دننگ کیرہ۔ اوپارے کہ مستین خڑک اٹی پاکستان و امریکہ دہشت گردی نا لعنت نا چٹفنگ کن اواری اٹ کاریم کرینو، پاک امریکہ شریداری ٹی القاعدہ ءِ شکست مسنے۔
دہشت گردی نا برخلاف پاکستان نا عزم انا اعادہ ءِ کرسا اوپارے کہ ہڑتوم آ ملک آتے ڈیہہ آن دہشت گردی نا غٹ دروشم و مظاہر آتے چٹفنگ کن اواری اٹ کاریم کننگ نا گرج ءِ۔ اوغانستان نا ذکر ءِ کرسا پاکستانی سفیر پارے کہ اوغانستان اٹی امن و سوگوی کن پاکستان و امریکہ بایدے اوار ی اٹ کاریم کیر ، پاکستان اسہ سوگو، پرامن و شونہال ءُ اوغانستان اس خوائک انتئے کہ مستین اٹی اوغانستان اٹی نزوری اان پاکستان زہمی مسنے۔
اسہ سوج اسے نا ورندی ءِ ترسا پاکستانی سفیر پارے کہ اوغانستان اٹی تینا گام تے تخنگ آن مست داعش ءِ شکست تننگ کن پاکستان و امریکہ ءِ اواری اٹ کاریم کروئی مریک۔ گڑاس امریکی کانود ساز آتا کنڈآن دہشت گردی نا برخلاف پاکستانی عز م آ گڑتی نا بابت سوج آ پاکستانی سفیر پارے کہ امریکی کانود سازآتے ڈغاری حق آن معلومدار کننگانے و اوفتے پاننگانے کہ او پاکستان نا بابت ہراتاثر ءِ کرینو او حق آتیا مبنی افس۔ پاکستان دہشت گردی نا برخلاف ہر ملک آن زیات گام گیج کرینے و آپریشن ”ضرب عضب“ نا سرسہبی اونا غٹ آن بھلا شاہدی ءِ۔ داسہ دا آپریشن نا بھرم تے سوگو کننگ کن آپریشن ”ردالفساد “ نا بناء کننگانے ہرانا بنداوی مسخت راج اٹی ڈکوک آ دہشت گرد آتے پٹنگ و بھس کننگ نا ءِ۔
