اسلام آباد(پاکستان نیوز پوائنٹ 10مارچ2017ء) پاکستان سپر لیگ سپاٹ فکسنگ نا معاملہ غا ایف آئی اے نا بنائی رپورٹ وزیرداخلہ ءِ پیش کننگاہراٹی پی ایس ایل اٹی سپاٹ فکسنگ نا توننگ نا بابت آن کروک آ گام گیج و گوازی گر تا اوار مننگ نا گمان نا بابت اہم ٹک آتا پیدواری کننگانے۔ وزارت داخلہ نا کنڈآن جاری بیان نا رداٹ رپورٹ اٹی پاننگانے کہ پی سی بی نا کنڈآن تروک آ معلومداری و ساڑی شاہدی تا فرانزک جاچ ءِ ہلسا زموار آتا تعین ءِ کننگک۔
رپورٹ اٹی پاننگانے کہ گوازی گر تا موبائل فون تیان کلہو آتے مٹائفنگ نا معاملہ نا ہم سرجم جاچ ءِ ہلنگ انگ ءِ تانکہ دا ہیت انا جاست وپاست ءِ کننگے کہ ہراگوازی گر تا بکی تتون رابطہ ئس و اوفتا نیام اٹ انت معاملہ غاک پک مسوسر۔ وزیر داخلہ چوہدری نثارعلی خان پارے کہ معاملہ محض گڑاس کرکٹر آتا جندی فعل و بدعنوانی نا ہی آخا بلکن ہندن انگا خبر آتیان ملک انا نیک نامی زہمی مریک ، ہنداخاطران دا ویل انا مفصل و ہرزاویہ آن جاست وپاست المی ءِ۔ اوپارت کرے کہ ایف آئی اے دباؤ یا اثرورسوخ آن زہمی مننگ آن بیدس معاملہ نا غیر جانبدارانہ جاست وپاست کے۔ اوایف آئی اے ءِ جاست وپاست زوت آن زوت پورو کننگ نا ہم پارت کرے۔
