اسلام آباد (پاکستان پوائنٹ نیوز11دسمبر 2018ء) مچ آ ملک اٹی 4دے ئی انسداد پولیو مہم دوشنبے آن بناکرینے۔ دوشنبے نادے جاری بیان اٹی فوکل پرسن انسداد پولیو بابر بن عطاپارے کہ سال انا آخیری انسداد پولیو مہم اٹی 5سال آن کم 3کروڑ 80 لکھ آن زیات چناتے پولیو آن بچفنگ نا پڑی کنفنگک۔ پولیو مہم اٹی 2لکھ 70 ہزار جان جوڑی نا محافظ بشخ ہلنگ ءُ۔ دا پولیو ٹیمک اُرا اُراغا ہنسا ودی مننگ آن ہلیس 5سال اسکان نا چناتے پولیو نا پڑی کنفرہ۔
اوپارے کہ رواں سال مچ آ ملک آن پولیو نا 8 کیس رجسٹرڈ مسر۔ 2014ء آن پولیو کیس آتے ٹی 97 درسد کمتی بسنے۔ دابھلا سرسہبی نا باوجود نومبر اٹی ملک انا ہفت بھلا شار تے ٹی پولیو وائرس پک مسنے۔ داشارتے ٹی سکھر، کراچی، پشاور، مردان ، لاہور، راولپنڈی و اسلام آباد اوار ءُ۔ بابر عطاء پارے کہ 10 دسمبر آن بناکروک آ پولیو مہم اٹی لمہ و باوہ ودی مننگ آن پنچ سال انا چناتے پولیو نا اِراپڑی ضرور کنفر۔
ہر پاکستانی جان جوڑی محافظ نا کڑد ءِ ادا کرسا داہیت ءِ المی جوڑ کیر کہ اونا اُرا و ایب و کیب اٹی اسہ چناس ہم پولیو نا پڑی تیان محروم سلپ۔ کوآرڈینیٹر قومی ایمر جنسی سنٹر انسداد پولیو ڈاکٹر رانا صفدر تینا بیان اٹی پارے کہ ساڑی موسم پولیو وائرس نا چٹفنگ کن گچین ءِ قومی انسداد پولیو پروگرام نا پورو کوشست ءِ کہ پولیو وائرس ءِ پولیو مہم نا کمک اٹ ہمیشہ ہمیشہ کن چٹفر۔ اومستی پارے کہ قومی انسداد پولیو پروگرام مچ آ ملک اٹی داہیتءِ المی جوڑ کرینو کہ چناتے پولیو پڑی ضرور کنفر تانکہ وائرس آن جان ءِ چٹفنگ مرے۔
