اسلام آباد(پاکستان نیوز پوائنٹ 02 فروری2016ء) ڈنمارک نا سفیر اولے تھونکے پنچ شنبے آ داڑے دفترخارجہ ٹی وزیراعظم نا خصوصی کمکار امور خارجہ سید طارق فاطمی تون اوڑدہی کرے۔ سید طارق فاطمی ہڑتوم آ ملک آتون خوشگوار تعلقداری تیا است جمی نا درشانی ءِ کرسا ہڑتوم آ کنڈآتا تعلقداری خاص کر معاشی ، واپاری و زرکاری نا بشخ آتیٹی تعلقداری تے پین سوگو جوڑ کننگ آ زورشاغا۔
اوسفیر ءِ جمہوری ادارہ غاتا سوگوی تون اوار معیشت و سیکورٹی نا بشخ اٹی پاکستان نا سرسہبی تیان معلومدار کرے و ہڑتوم آ کنڈآتا تعلقداری تا مون آ دننگ کن سفیر نا کڑد انا ستاءِ کرے اواومیت ظاہر کرے کہ سفیر اولے تھونکے تعلقداری تیٹی ودکی کن داوخت اسکان دوئی مروک آ پیش رفت ءِ مستی سوگو جوڑ کیک۔ ڈنمارک نا سفیر اولے تھونکے پاکستان نا کیہی بشخ بشمول متبادل توانائی، سیمنٹ انڈسٹری ، دوائی سازی و دیر ءِ صاف کننگ نا بشخ آتیٹی ڈنمارک نا کنڈآن زرکاری ٹی ودکی نا بارواٹی معلومدار کرے۔ اوپارے کہ ڈنمارک شونداری امداد اٹی ودکی نا خواہندار ءِ۔ اواسلام آباد اٹی تینا و تینا ٹیم اتون کمکاری آ وزیراعظم نا خصوصی کمکار نا منت واری ءِ ادا کرے۔
