اسلام آباد(پاکستان نیوز پوائنٹ 31جنوری2016ء) وزیراعظم محمد نوا زشریف فلسطینی کاز اکن پاکستان نا مخ تفی ءِ برجاہ تخنگ نا عزم انا اعادہ ءِ کرسا جہانی برادری آ زورشاغا کہ او فلسطین نا ویل انا ایسری کن تینا کڑد ءِ ادا کے، دا ویل انا ایسری آن بیدس ڈیہہ ٹی امن اڈہلنگ کپک۔ اوداخیال آتا درشانی ءِ سے شنبے آ داڑے وزیراعظم ہاؤس اٹی فلسطین نا صدر محمود عباس تون اوار مشترکہ پریس کانفرنس آن تران کرسا پارے، داکان مست ہڑتوم آ راہشونک ون ٹو ون اوڑدہی و ڈل انا کہول آ مذاکرات کریر۔
وزیراعظم محمد نواز شریف فلسطینی صدر تون اوڑدہی ءِ بے کچ فائدہ مند گوندسا پارے کہ پاکستان فلسطین کن تینا مخ تفی ءِ برجاہ تخک۔ وزیراعظم پارے کہ پاکستان فلسطینی علاقہ غاتیان اسرائیلی آبادی نا کشنگ نا مخ تفی ءِ کیک۔ اوپارے کہ دے ٹکی نیامی ٹی امن کن کروک آ کوشست آتا مخ تفی ءِ کرسا کینہ۔ داوخت آ فلسطین نا صدر محمود عباس پارے کہ اودے وزیراعظم محمد نواز شریف تون اوڑدہی کرسا بھاز خوشی مس ، اوڑدہی ٹی علاقائی و جہانی معاملہ غاتیا سرجم خیال آتا درشانی مس، وزیراعظم محمد نواز شریف ءِ اسرائیل بیدادیو مقبوضہ علاقہ غاتا حالیت آتیان معلومدار کننگا۔
اوپارے کہ اوڑدہی ٹی ڈیہہ ٹی دہشت گردی و انتہاپسندی نا معاملہ غاہم ہیت مس۔ اوپارے کہ پاکستان مہمان نوازی کن معروف ءِ، نن تعلیم و کیہی بشخ آتیٹی کمکاری آ ہم پاکستان نا منت وار اُن، فلسطینی طالب علم آک پاکستان نا تعلیمی ادارہ غاتیان فائدہ ہرفنگ ءُ۔ محمود عباس فلسطین کن امداد و مخ تفی ءِ برجاہ تخنگ آ وزیراعظم نا منت واری ءِ ادا کرسا پارے کہ نن اسلام آباد اٹی فلسطینی سفارت خانہ نا جوڑ جاڑ اٹی کمکاری آ ہم منت وار اُن۔
ڈیہہ نا حالیت آتا ذکر ءِ کرسا اوپارے کہ مقبوجہ کشمیر نا ویل آ پاکستان نا موقف نا مخ تفی ءِ کینہ، کشمیر نا ویل ءِ بایدے اقوام متحدہ نا قرارداد آتا رداٹ ایسر کننگے۔ اوپارے کہ نن کشمیر نا ویل انا ایسری کن پاک بھارت مذاکرات نا مخ تف اُن۔ فلسطینی صدر پاکستان و اونا الس کن نیک است خواہی تا درشانی ءِ ہم کرے۔
