اسلام آباد(پاکستان نیوز پوائنٹ 30جنوری2016ء) وزیر مملکت انفارمیشن ٹیکنالوجی و ٹیلی کام و مسلم لیگ (ن) نا راہشون انوشہ رحمان پارینے کہ حدیبیہ مل آتا 1.2ملین روپئی نا غٹ وام تے تننگانے و داسہ دا کیس بایدے جہہ جاگہ مرے، تحریک انصاف بیرہ کڑد کشی و وزیراعظم و اونا خاہوت آ دروغ انا دوبہ خلنگ اٹی اختہ ءِ۔ دوشنبے آ داڑے میڈیا تون ہیت وگپ اٹی اوپارے کہ حدیبیہ ملرزآتے کن ہلوک آ پیسہ غاتیٹی الس نا پیسہ اوار اف و نئے دا پیسہ غاتیٹی اسٹیٹ بینک یا پین اسے مالیاتی ادارہ غاتیان ہلوک آ وام اوارءِ۔
اوپارے کہ حدیبیہ مل آتا پیسہ غاتا لین و دین اِرا ادارہ حدیبیہ مل و ہجویری مضاربہ نا نیام اٹ ءِ و داوخت ہجویری مضاربہ نا چیف ایگزیکٹو اسحاق ڈار ئس وخت اس کہ اوڑآن پد کیہی پین چیف ایگزیکٹو آک بسنو۔ انوشہ رحمان پارے کہ اینو عدالت اٹی حدیبیہ مل آتا وام تا تننگ نا بابت غٹ شاہدی تے پیش کننگانے، گدرینگوک آ 23سال اٹی 13جتا جج صاحب آک ہم حدیبیہ کیس آ فیصلہ بنفینوو داسہ دا کیس بایدے جہہ جاگہ مرے۔
مسلم لیگ (ن) نا راہشون پارے کہ پی ٹی آئی مہالو وزیراعظم محمد نواز شریف و اوکان پد اونا مسڑ مریم نواز شریف نا پد اٹ تما و داسہ اونا توپ آتا مون اسحاق ڈار نا کنڈآٹی ءِ ، تحریک انصاف بیرہ کڑد کشی ، وزیراعظم و اونا خاہوت آ دروغ انا دوبہ و جہہ جاگہ مروک انسان تیان ناچ گانا کننگ ءِ۔ انوشہ رحمان دا اومیت نا درشانی ءِ کرے کہ انشاء اللہ عدالت اٹی پیش کروک آ شاہدی تیا سرسہبی دوئی کینہ۔
