اسلام آباد(پاکستان نیوز پوائنٹ 27جنوری2016ء) وزیراعظم محمد نواز شریف پارینے کہ آخبت اٹی معاشی میدان اٹی بھاز سخت مقابلہ نا مون تروکی مریک، جدید علوم آ نن چکار تختون تو نن دنیا نا مقابلہ ءِ کننگ کپنہ، مچ آملک انا تعلیمی ادارہ غاتے جدید آسراتی و طالب علم آتے جدید علوم آن آراستہ کننگک۔ او جمعہ آ وزیراعظم آفس اٹی 21می صدی کن پاکستان نا تیاری نا سرحال آ دود اٹی خیال آتا درشانی ءِ کریکہ۔
دود انا بست و بند ءِ پاکستان الائنس فارمیتھ اینڈ سائنس کریسس و اوٹی بنجائی وزیر پٹرولیم و قدرتی وسیلہ شاہدخاقان عباسی ، بنجائی وزیر فوڈ سیکورٹی سکندر حیات بوسن ، وزیراعظم نا خصوصی کمکار امور خارجہ طارق فاطمی ، وزیر زرکاری مفتاح اسماعیل آن بیدس اسمبلی نا باسک ،تعلیم نا چاہندار و غیر سرکاری تنظیم تا نمائندہ غاک بھلو کچ اسے ٹی ساڑی ئسر۔
وزیراعظم محمد نواز شریف پارے کہ تعلیم نا سرحال بے کچ اہمیت تخک۔ ریاضی و سائنس نن کن اجنبی اصلاحات افس، دا علوم نا ماسک بھاز مرغن ءُ ، آخبت نا دارومدار ہندا علم آتیا مہارت آٹی ءِ۔ اوپارے کہ نن ہندن ءُ ڈیہہ اسے ٹی رہینگنہ ہرانا تہذیب و میرات پیڑی متکن ءُ و دا تہذیب جتا علم آتیٹی مہارت نا حامل ئس۔ اوپارے کہ دنیا آن جہالت نا تہاری ءِ چٹفنگ کن نبی کریم ﷺنا ظہور مس۔
طبیعات، ریاضی، حیاتیات تون اوار کیہی بشخ آتیٹی بوعلی سینا ، البیرونی ، جابر بن حیان کون آ سائنسدانک سائنسی طرز فکر نا بنداو ءِ تخار۔ اسلامتی تہذیب و تمدن اٹی دا چاہندارآتا کلیدی کڑد مس۔ اوپارے کہ برصغیر نا مسلمان تا سیاسی بیداری ٹی ہم علمی راہشون تا اہم ءُ کڑد اسے ، سرسید احمد خان آن ہلیس قائد اعظم اسکان غٹ علمی و سیاسی میدان اٹی مسلمان تے بیدار کریر و اینو نن پاکستان نا آزاد فضاء ٹی دم ہلنگ اُن۔
وزیراعظم پارے کہ ماضی ٹی حکومت آک تعلیمی بشخ آ درکارچکار تخنگ کتوس۔ اوپارے کہ ننے تینا چناتے کن لائحہ عمل اس جوڑ کروئی ءِ و دا چرجوئی ٹی ڈیوالائی نا درشانی ءِ کرین تو تاریخ ننے معاف کپک۔ اووزارت کیڈ و صوبائی حکومت آتے پارت کرے کہ ریاضی و سائنس ناتعلیم نا بابت اینو پیش کروک آ رپورٹ نا جاچ ءِ ہلیر و دانا سفارش آتے ہُننگ و اوفتیا عملدرآمد کن حکمت عملی اس مرتب کیر۔ داکان مست ڈاکٹر صبیح انور، ڈاکٹر کلثوم حیات، مشرف زیدی، جبران سیٹھی و شہزاد رائے ہم دود آن تران کریر و ریاضی و سائنس نا تعلیم نا بابت شینک مروک آ رپورٹ آ خیال آتا درشانی ءِ کریر۔
