اسلام آباد(پاکستان نیوز پوائنٹ 24جنوری2016ء) مسلم لیگ (ن) نا راہشون دانیال عزیز پارینے کہ عمران خان و جہانگیرترین الیکشن کمیشن و سپریم کورٹ اٹی استثنیٰ خوائنگ ءُ ، وزیراعظم محمد نواز شریف تینے خاہوت تون اوار احتساب کن پیش کرینے۔ سپریم کورٹ نا پیشن میڈیا تون ہیت وگپ کرسا اوپارے کہ عمران خان میڈیا آ پارے کہ اونا کیس اٹی حکم امتناعی جاری مسنے ولے او دروغ تڑنگ ءِ۔
اوپارے کہ اگہ حکم امتناعی جاری مسنے تو اودے عدالت نا مون آ پیش کے۔ اوپارے کہ ہائی کورٹ 6تو پد بینچ اس اڈ تسنے و عمران خان اونا مون آ پیش مفننگ ءِ ۔ دانیال عزیز عمران خان ءِ مخاطب کرسا پارے کہ نا پٹنگ نا وخت بسنے داسہ نا دامون و ایمون نا جیب تیان کل پیش تمرہ و ننے سماءِ نا جیب تیٹی انت ءُ۔ اوپارے کہ وزیراعظم محمد نواز شریف مسٹ میکو وار گچین مروک آ وزیراعظم ءِ وخت اس کہ نے الس ضمنی، میونسپل ، بلدیاتی ، کشمیر و گلگت بلتستان نا گچین کاری تیٹی مسترد کرینے و مسلم لیگ (ن) نا اومیت دار آتے سرسہبی دوئی مسنے۔
مسلم لیگ (ن) نا راہشون پارے کہ عمران خان عدالت اٹی شعر بنفک، عدالت اٹی شعر آخا شاہدی پیش کروئی مریک۔ اوپارے کہ عمران خان و جہانگیر ترین سپریم کورٹ و الیکشن کمیشن اٹی استثنیٰ خوائنگ ءُ وخت اس کہ وزیراعظم محمد نواز شریف تینے تینا خاہوت تون اوار احتساب کن پیش کرینے۔ دانیال عزیز پارے کہ خیبر پختونخوا ٹی انصاف نا ہیت ءِ کروک آعمران خان اینو اسکان جنرل (ر) حامد نا جاگہ پوسکن ءُ عہدیدار اس تعینات کننگ کتو۔ اوپارے کہ عمران خان نی احتساب آن نرنگ اُس نن نے احتساب پیش کننگ کن اتینہ۔
