اسلام آباد(پاکستان نیوز پوائنٹ 23وری2016ء) پاکستان مسلم لیگ (ن) نا سینیٹر لیفٹیننٹ جنرل (ر) عبدالقیوم خان پارینے کہ پاکستان و اوغانستان ءِ دہشت گردآتا ہن و بر ءِ توننگ کن سیمی بست و بند آتا نظام ءِ گچین جوڑ کننگ نا گرج ءِ۔ ریڈیو پاکستان تون ہیت وگپ کرسا اوپارے کہ پاکستان اٹی دہشت گردی ءِ آپریشن ضرب عضب اٹ چٹفنگ انگ ءِ۔ اوپارے کہ پاراچنار اٹی دہشت گرد جلہو نا بابت ہیت وگپ کرسا پارے کہ پاراچنار پاک اوغان سیم آ واقع بھاز اہم ءُ علاقہ اسے و اوغانستان آن بھاز انگا دہشت گرد آک داعلاقہ آن پاکستان اٹی پترینگسا و کارروائی کرسا پدی کارہ۔
لیفٹیننٹ جنرل (ر) پارے کہ دہشت گردآتا ہن و بر ءِ توننگ کن پاک سیکورٹی فورس آتا 8سد چوکی وخت اس کہ اوغانستان نا بیرہ 62چیک پوسٹ آک سیمی علاقہ ٹی کاریم کننگ ءُ۔ اوپارے کہ پاک فورس آک دہشت گرد آتا بھاز انگا کارروائی تے بے سہب جوڑ کیرہ ، اونا باوجود جاگہ نا جاگہ اس چنکو واقعہ اس پیش بریک۔ سینیٹر عبدالقیوم پارے کہ اوغان حکومت نا کیہی علاقہ غاتیٹی رٹ قائم اف ولے اوغان و پاکستان ہڑتوم آ ملک آتے بایدے مرے کہ دہشت گرد آتا سیم پار ہن و بر ءِ توننگ کن سیمی بند و بست نا نظام ءِ گچین جوڑ کننگ کن اسہ ایلو تون کمک کیر۔
اوپارے کہ چیف آف آرمی اسٹاف نا پاراچنار نا دورہ ، دھماکہ نا ٹھپی تا جان پڑسی دہشت گرد آتا چٹفنگ نا عزم انا درشانی خوش آئند ءِ ۔ اوپارے کہ پاکستان مسلم لیگ (ن) نا حکومت و سیکورٹی فورس آک دہشت گرد آتا چٹفنگ کن یکجاءُ و نیشنل ایکشن پلان آ عملدرآمد آن دہشت گردی ءِ چٹفنگ انگ ءِ۔ پاکستانی سیکورٹی فورس آک پورووڑاٹ شدت پسند آتا چٹفنگ کن اختہ ءُ و ساڑی حکومت دہشت گردآتون مون تننگ کن پین پالیسی وضع کننگ نا کوشست کننگ ءِ۔
