اسلام آباد(پاکستان نیوز پوائنٹ 19نوری2016ء) پاکستان مسلم لیگ (ن) نا راہشون دانیال عزیز پارینے کہ پاناما کیس آنبار عمران خان و جہانگیر ترین نا برخلاف کیس آتا سماعت ہم بایدے ہردے نا بنداو آ مرے، پاناما پیپراٹی وزیراعظم محمد نواز شریف نا پن اف، تحریک انصاف بی بی سی نا متکن آ رپورٹ ءِ داپالو اے پالو کرسا پیش کننگ نا کوشست کننگ ءِ۔ پنچ شنبے آ سپریم کورٹ نا پیشن میڈیا تون ہیت وگپ کرسا اوپارے کہ وزیراعظم محمد نواز شریف ہچ وڑنا غلط بیان اس کتنے۔
اوپارے کہ الیکشن کمیشن اٹی غلط میرات جوڑ کننگ نا کیس عمران خان و جہانگیر ترین نا برخلاف ہم ارے ، اصولی وڑاٹ غٹ کیس آتا فیصلہ گاتے کن اسہ وڑوڈول اس تینا کننگ نا گرج ءِ۔ اوپارے کہ داوخت آ عدالت عظمیٰ نا کنڈآن ہراشاہدی تے خوائنگ انگ اٹی ءِ او ننا کنڈآن پیش کننگ انگ ءُ اونا برعکس عمران خان الیکشن کمیشن اٹی ورندی جمع کرفپننگ ءِ و پائک کہ اوڑآن ورندی طلب کننگ مفک۔
دانیال عزیز پارے کہ ہراوڑوزیراعظم نا برخلاف دروغ انا کیس انا سماعت ہردے نا بنداو آ کننگ انگ ءِ ہنداوڑ عمران خان و جہانگیر ترین نا برخلاف کیس آتا ہم با یدے سماعت مرے۔ اودوبہ خلک کہ عمران خان ٹرائل و کمیشن جوڑ کننگ اٹی اڑاند شاغنگ ءِ وخت اس کہ وزیراعظم محمد نواز شریف تینے و تینا خاہوت نا بندغ آتے عدالت نا مون آ پیش کرینے۔ دانیال عزیز پارے کہ محمد نواز شریف مسٹ میکو وار دا ملک انا گچین کروک وزیراعظم جوڑ مسنے، داکان مست ہم اوڑآ 52کیس ئسر ہرافتے ٹی او سرسہب مس ، الس ہم وزیراعظم تون سلوک ءِ ہندا سوب ءِ کہ پاکستان مسلم لیگ (ن) گلگت بلتستان ، آزاد کشمیر و ضمنی گچین کاری تیٹی ہروڑنا منفی پروپیگنڈہ ءِ مسترد کرسا سرسہبی دوئی کرینے۔
اوپارے کہ پی ٹی آئی کیس انا وڑوڈول آ تذبذب نا گواچی ءِ و عمران خان داسہ دوبہ غاتیان دستبردار مرسا پارلیمان اٹی تقریر نا کیس ءِ کننگ ءِ۔
