کوئٹہ(پاکستان نیوز پوائنٹ 09جنوری2016ء) صوبائی وزیر داخلہ میر سرفراز بگٹی و ترجمان حکومت بلوچستان انوارالحق کاکڑ پارینے کہ بلوچستان و پاکستان لازم و ملزوم ءُ، استاد و مزور آتا خون کننگ و قومی تنصیب آتیا جلہو کروک آک شونداری نا کسر ءِ توننگ نا ایجنڈا غا عمل کننگ ءُ ولے توفک نا زور آ ہچ گہس ءِ تینا نظریہ ءِ مسلط کننگ کن ہلیپنہ، فرنٹیئر کور ، پولیس و کانود نافذ کروک آ ادارہ غاتا خواری نا بدولت بلوچستان امن نا شاہراہ آ مون آ ہِننگ ءِ ، بلخ شیر بادینی پیشن نا ملک اٹی تولوک نام نہاد بلوچ آتے کن رول ماڈل نا حیثیت تخک ، دہشت گردی نا برخلاف برجاء جنگ اٹی ایف سی نا اہم ءُ کڑد اس مسنے۔
داخیال آتا درشانی ءِ او دوشنبے آ کالعدم تنظیم نا مسکوہی باسک بلخ شیر بادینی نا قومی دنگ اٹی اوار مننگ آ ایف سی مددگار سینٹر کوئٹہ ٹی پریس کانفرنس آن تران کرسا کرے۔ داوخت آ فرنٹیئر کور نا بریگیڈیئر خالد بیگ، ڈپٹی کمشنر کوئٹہ عبدالواحد کاکڑ تون اوار ایلو کمامدارآک ہم ساڑی ئسر۔ اوپارے کہ کالعدم تنظیم نا خلقت تینٹ دبئی تون اوار ایلو ملک آتیٹی تولوک آرام نا زند اس تدیفنگ ءُ ولے بلوچ ورناتے ایندھن آمبار کاریم اٹ اتنگ ءُ ، کالعدم تنظیم نا مسکوہی کمانڈر بلخ شیر بادینی تون فرنٹیئر کور بلوچستان رابطہ ٹی ئس و اودے سرنڈر کرفنگ آ ایف سی بلوچستان مبارکباد نا حقدار ءِ ، بلخ شیر بادینی نا پدی بننگ خوش آئند گام اسے، پیشن نا ملک اٹی تولوک بلوچ آک نام نہاد ایجنڈا نا پوروی کن استاد و مزور تا خون ءِ کریر و قومی تنصیب آتیا جلہو کریر الس نا کمک نا بدولت توفک نا زور آ ہچ گہس ننا زی آ تینا نظریہ ءِ بٹنگ کپک انتئے کہ بلوچستان و پاکستان لازم ملزوم ءُ، اوپارے کہ فرنٹیئر کور ، پولیس و لیویز نا کارندہ غاتا دے و نن خواری نا بدولت بلوچستان مون آ ہِننگ ءِ ، بلخ شیر بادینی پیشن نا ملک اٹی تولوک نام نہاد بلوچ آتے کن رول ماڈل اسے نا حیثیت تخک ، دہشت گردی نا برخلاف برجاء جنگ اٹی ایف سی نا اہم ءُ رول اس مسنے۔
اوپارے کہ بلخ شیر بادینی نا ایلو سنگت آک ہم رابطہ ٹی ءُ و او پدی تینا اُراتیا بننگ خوارہ ، بلخ شیر بادینی و اونا خاہوت ءِ فرنٹیئر کور بلوچستان پورو سیکورٹی فراوان کیک۔ داکان مست کالعدم تنظیم نوشکی نا کمانڈر بلخ شیر بادینی پارے کہ ای کم وئی نا سوب ملک دشمن نا بہکاوہ ٹی بسوسٹ اوکان گڈ کم وئی و نادانی نا سوب پیشن نا ملک ہنسا کالعدم تنظیم نا بشخ جوڑ مسٹ و غلطی نااحساس مننگ تون ہی تینا وطن پاکستان آ بسونٹ۔ اوپارے کہ ای بلوچ ورناتیان خواست کیوہ کہ او اعلیٰ تعلیم حاصل کرسا ملک و قوم نا شونداری ٹی تینا کڑد ءِ ادا کیر۔
